Wekîlê DEM Partî yê Şirnexî Mehmet Zekî Îrmezî derheqê talankerdişê xozaya Şirnexî de ANFyî rê qisey kerd.

Îrmezî bale ante herîmnayîşê awa Çemê Nerduşî ser û vat: ''Na awe amebî pakîkerdene û hinî ameyêne şimitene. Awa çemî xeylêk dewan rê çime bîye. Herêma çemî dîyaye Bolunmez Holdingî. Bi pompakerdişî awa çemî ameye herimnayene. Ganî şaredarîya qeyûmî na awe pakî bikerdêne. Nika qet yew gandar nêeşkeno mîyanê na awe de biciwîyo.''

Îrmezî ard ziwan ke îqtîdarê AKP-MHPyî serra 2016î ra dima polîtîkayêka 'asayîşî' ya newîye vista dewre û vat: ''Herême de teyna hetê ekonomî û komelkî ra ney hetê ekolojîkî ra konseptêkê ablûqakerdiş û xalîkerdişî est o. Şirnex de xoza yena talankerdene û wêrankerdene. Herêmanê Cûdî, Gabar û Besta de darî birîyenê. Emser zî Elkê de talankerdiş dîya destpêkerdene. Îqtîdarê AKP-MHPyî hetê leşkerî, sîyasî, komelkî û psîkolojî ra rijnayîşê herême armanc keno.Teyna Şirnex de ney Bedlîs, Çewlîg, Dersim, Mêrdîn, Amed de zî darî birîyenê.''

Îrmezî îfade kerd ke xeta Gabarî de talanêo cidî est o û vat: ''Hem warê daristanî talan beno hem zî rayîrê talankerdişî virazîyenê. Şar karanê sondajî yê şîrketan ra nêeşkeno awe bido baxçeyanê xo. Cûdî de karê cigêrayîşê petrol û ocaxanê komirî, Besta de birnayîşê daran, qedexeyê 'herêma taybete', karê sondajî... Herêmê ma şarî rê qedexe yê la şîrketanê sey MTA rê serbest ê. Şar heta ke cendirmeyan ra belgeyê destûrî nêgêro nêeşkeno derbazê wareyan bibo. Serran 90an de zî kerdişê winayênî çin bîyî. Şar û rêxistinê komelê sivîlî û ekolojîkî vera nê kerdişan têgêrenê la nêeşkenê netîce bigêrê. Tîya de huqûqê kolonyalîzmî serdest o. Eleqeyê ney zî bi meseleya kurdan est o. Heta ke meseleya kurdan çareser nêba kerdişê winayênî do dewam bikerê.''