Vera peymana Bexdad-Hewlêrî ya serê Şingalî nêrazîbîyayîşî dewam kenê. Vera peymane 3ê kanûne de verê Asayîşê Êzidxanî de çalakîya nobete dîyabî destpêkerdene.

Hemsereka Meclîsê Demokratîkî yê Şingalî Xezale Reşo derheqê peymane de qisey kerd û vat: ''Ma wazenê Şingal xoser bibo. La hukmatê Bexdad û Hewlêrî nê waştişê ma asteng kenê. Înan 6 serran êzidîyan rê neheqîye kerde. Nika zî ê wazenê pê na peymane qirkerdişê neweyî bikerê. Birê ke bêîradeyê êzidîyan yenê girewtene nênê qebulkerdene. Ma wazenê xo îdare bikerê. Ma vera Iraqî tênêgêrenê. Ma zî hemwelatîyê ci yê. Eke waştişê ma bêrê caardene êzidîyî do abigêrê wareyê xo û verê qirkerdişan do bêro girewtene.''

Berpirsa Meclîsê Şingalî Neame Bedel zî vat: ''Kazimî û Barzanî nêeşkenê meseleyanê Şingalî çareser bikerê û nameyê ma ser o biran bigêrê. Ma na peymane red kenê. Ma venga pêro dewletan danê ke eke ê wazenê seba êzidîyan çîyêk bikerê wa goş bidê şarê Şingalî ser. Wa bêrê goranê ma yê komkîyan bivînê. Ê wazenê bi na peymane pêro êzidîyan bikerê kole, destkewteyanê êzidîyan çin bikerê. Ma sey êzidîyan çîyêkê winasênî qet qebul nêkenê. Jeanîne Hennîs-Plasschaert herinda ke xayînan de pêbikera seba azadkerdişê cinî û domananê ke destê DAÎŞî de yê çîyêk bikera.''