Federasyonê Komeleyanê Paştdayîş û Huqûqî yê Keyeyanê Tepişteyan û Hukmwerdeyan ê MEDî (MED TUHAD-FED), Kongreya Komelê Demokratîkî (KCD), Têgêrayîşê Cinîyan ê Azadan (TJA), DBP û HDPyî derheqê rojbîyayîşê 73. û azadîya Rayberê Şarê Kurdî Abdullah Ocalanî de kombîyayîşêk kerd.

Hemserekê MED TUHAD-FEDî Zekî Baranî vist vîrî ke Ocalan 23 serrî yo binê tecrîdêkê girankerdeyî de yo û vat: ''2013 ra nata Newroza tewr pîle yê 2022yî bîye. Na Newroze de reyna kurdan seba çareserîye Birêz Ocalan mojna. Girseyan Newroze de azadîya Abdullah Ocalanî waşte. No waştiş heman wextî de seba çareserîya meseleya kurdan vengdayîşêk bi. 4ê nîsane rojbîyayîşê Birêz Ocalanî yo. Hewteyê verênî yê nîsane de seba nê rojbîyayîşî şitilî ronîyenê. Ma venga şarê xo danê ke her ca de heta 10ê nîsane şitaln rono. Ma venga şarê xo danê ke seba çareserîya meseleya kurdan, seba qedînayîşê tecrîdî 4ê nîsane de Xalfetî de tewrê Rayraşîyayîşê Amara bibo.''

Hemsereka DBPyî Salîha Aydenîz zî kombîyayîş de dîyar kerd ke çareserîya meseleya kurdan de rolê Ocalanî zaf girîng o û vat: ''Bi ruhê 8ê Adare û Newroze ma 4ê Nîsane pêşwazî bikerê û verê xo bidê Amara.''

Hemserekê KCDyî Berdan Ozturkî vat: ''Xêrê Ocalanî ra kurdî newe ra zîl bîyî, înan nasname û kulturê xo şinasnayî. Coka 4ê Nîsane seba ma rojêka tarîxî û girîng a.''