Bi îtîrazê MHP’yî yo ke hemparê AKP’yî yo, Qers de rayê 167 sindoqan newe ra ameyî hûmaritene. Namzedê HDP’yî Ayhan Bîlgenî vat, “Hûmaritişê rayan qedîya, 17 rayê bînî rayanê ma ser o bîyî zêde.”
Qers de ke HDP ûca bi ser kewtibi, serê îtîrazê MHP’yî ra rayê bajarî newe ra ameyî hûmaritene. Hûmaritişê rayan ê Heyetê Weçînitişî yê Bajarî no şodir qedîya.
Rayê ke sindoqan de bîyî newe ra ameyî hûmaritene û netîce de 17 rayê HDP’yî bîyî zêde. Hemşaredarê HDP’yî yê Qersî Ayhan Bîlgenî serê hesabê xo yê Twîtterî ra peyamêk şirawit û vat, “Newe ra hûmaritişê rayanê Qersî qedîya. Rayê ma 17 rayî bîyî zêde. Ma ê kesanê ke heta şodir zereyê edlîye de xebitîyayî û verê edlîye de vindertî hemine rê spas kenê.”
