Polîsanê Tirkan  saetanê şanê Şeme de ciwanêko bi nameyê Recep Hantaş Sumerparkê Amedî de înfaz kerd. Hantaş wexto ke ciwanêk reyde park de roniştibi ame înfazkerdene.

Cenazeya Hantaşî Nêweşxaneyê Unîversîteya Dîcle ra ame girewtene û Goristanê Yenîkoyî de ameye wedardayene. Teberê keyeyê ci de hêzanê çekdaran ê Tirkî destûr nêda ke tu kesêk şoro serê gorî.

Efe Hantaş, birayê Recep Hantaşo ke serra 1999 de Licê de ameyo dinya ANF’yî rê qisey kerd.

Efe Hantaşî vat polîsan vernîye birayê ci yo ke Bursa de înşeatî de xebitîyeno rê telefon a kenê û vanê, “Birayê şima nêweşxane de yo, leze bêrê” û birayê ey zî telefon akerdo û xebere daya ci.

Hantaşî vat, “Mi hûmara keso ke telefon akerdo ci ra waşte. Mi telefon akerd. Polîsan mi ra va, ‘Bêrê nêweşxane’. Ma şodir şîyî nêweşxane la tu zanayîşêk nêda ma. Ma qase saetêk û saetêk nême pawit. Xeylî cehdkerdişî ra dima seba teşhîsê ez berda zere. Mi nas kerd, doktorî vat, sereyê şima weş bo’.”

Hantaşî da zanayene ke bado înan polîsan reyde pêvînayîş kerdo û vat, “Vat îxbarêk înan rê ameyo. Birayê min o rehmetî Sumerpark de hevalêkê xo reyde roniştî bîyo. Rîyê îxbarî ra operasyon ameyo kerdene.”

Hantaşî vat polîsan zanayîş nêdayo ke operasyon senî ameyo viraştene,  pêkewtiş qewemîyo yan ney û vat, “Leyê birayê mi de tewr çekêk zî çin bîya” rixmê ci operasyon berdo ser û merdim vera çîyêkê winasî  de şaş beno maneno

Hantaşî vat, “Tu zanayîşêk zelal çin o, no operasyon senî bi, saete çend bi” û pêvînayîşê ke birayê xo reyde verê cû kerdê pare kerdî û vat, ''Polîsan timî GBT'yê ey de nîyadayêne û vatêne ‘şima terorîst ê’ û tim birayê mi tehrîk kerdêne. Vatêne ‘çîyanê sîyasî nêkerê, dizdîye bikerê, hevalanê xo yê ke nê karî kenê vajê, ma do şima bipawê’ timî zext û zordarîye bi ci kerdêne.