Sûrê Amedî ke dimayê Sedê Çînî sûro tewr derg ê dinya yo, rîyê îhmalkarîye ra fikar esto ke birijîyo. Dimayê varayîşo zêde yê zimistanê ravêrteyî, qismêkê Sûrî ke mîyanê şarî de sey Ben û Sen ameyêne namekerdene, rijîya. Ronişteyê mehlaya Ben û Senî yê ke nêzê bircî de yê rijîyayîşî ra dima vat ke ê bifikar ê ke do nizd ra bi temamî birijîyo. Ronişteyanê mehla reaksiyon da û vat, “Ma pêroyê mehla bifikar ê. Rixmo ke ma selahîyetdaran ra vat virazê zî ameyî bi alçî tayê zî derz kerdî û şîyî.”

Ronişteyê mehla ra Denîz Gulerî yo ke rojnameyê Evrenselî rê qisey kerd vat, “Ma nêewtarenê mehla de bigêrê. Ma bi zerrasanî nêeşkenê şirê keyeyê xo û bêrê. Keyeyê ma binê sûrî de yê. Wextêko derg o ke Sûr bêwayîr ameyo verdayene. Birc ma sere de bêro warî do se bo? Ma ganî merdimî bimirê?”

Ronişteyêko bîn Yaşar Hantaşî zî rojnameyî rê qisey kerd û vat ke ê bi ters û fikar ê. Hantaşî vat, “Birc bêwayîrîye ra rijîya. Tena no het nê, Sûr seranser nê halî de yo. Ganî tavilî bêro restorekerdene, ne ke do birijîyo û merdimî bin de bimanê.”