Qezaya Bismilî ya Amedî de Komeleya Yewîye Hetkarî û Paştdayîşê bi Keyeyanê Vînîbîyayeyanê ke Merdimê Xo Dergûşê Merdimîye de Vînî Kerdê (MEBYA-DER) vizêr  derheqê esteyanê ke 2021 de xirbeyê binê Mudirîya Polîsan a Bismilî de ameyî dîyene de eşkerayîye daye.

Endam û îdarekarê TUAY-DER, DBP, HDPyî zî tewrê eşkerayîye bîyî. Mustafa Kurt û Turgut Yeşîlsoyî eşkerayîye daye.

Verî merdimanê vînîbîyayeyan ra Atîla Yenîsoyî qisey kerd û vat: ''90an de zaf kesî Bismil de kişîyayî. Nînan ra tay kesî Uzehîr Kûrt, Mehdî Olmaz û birayê min Turgut Yenîsoy o. Polîsan birayê mi berd û ma dima o qetî nêdî. Çend rojî verî binê qereqolî de esteyê merdiman ameyê dîyenê. Beno ke nê esteyê merdimanê ma yê. Ganî nînan rê testê DNA bêro kerdene. Seba ke no serebût nêro mîyankerdene ma xîret bikerê. Ma têna esteyanê xo wazenê û wazenê sûcdarî bêrê cezakerdene.''

Merdimanê Uzehîr Kurtî ra Mustafa Kurtî zî wina qisey kerd: ''Seke ma eşnawito cenazayê 3 kesan ameyê dîyene. Dima ke wekîlanê HDPyî na mesele berde Meclîs xebata kênayîşî vinderte. Ma bi serran o gêrenê esteyanê xo. Nê herêman de bi hezaran vînîbîyayeyî est ê. Ganî keyeyê vînîbîyayeyan na babete de bêveng nêmanê.''