Buldane Şêx Seîd ard vîrî û wina va: ”Şarê Erziromî mezela Şêx Seîd ê hecayî perseno. No şar cayê mezela ey wazeno. No şar wazeno ke krîzê ekonomîyî ra, feqîrîye û sefîlîye ra raxelesîyo.”

Buldane verî Qezaya Erziromî Xunis de şarî de ameye têhet û peyê cû derbazê Tatosî bîye û verê buroyê weçînîtişî yê HDP’yî de şarî de ameye têhet. Namzedê hemserekîya Şaredarîya Tatosî Muzahît Karakuş û Yanez Çelîke zî beşdarê programî bîyî.

Buldane qiseykerdişê xo de va şar seba ke qeyûman ra hesab biperso 31’ê Adare paweno û wina dewam kerd: ”Şar ma her ca de bi eynî coş û qerardarîye qebul keno. HDP wina yo. Her cayê Tirkîya bi renganê HDP’yî xemelîyaye yo. Rojawan de zî, tîya de zî eynî yo. Şarê ma seba ke 31’ê Adare de qeyûman def bikero bîyo seferber. Ma na qerardarîye ewro tîya de zî vînenê.”

ŞAR MECBUR NÎYO KE REYA XO BIDO ŞIMA

Buldane va qeyûmo ke Şaredarîya Tatosî rê ameyo tayînkerdene şarî rê xizmet nêkeno û wina dewam kerd: “Qeyûmê Tatosî, seba ke reyanê xo nêdanê ci, şarê taxan rê gefan waneno û kemeranê peyarayîran dareno we û rayîran xerepneno. Zaf eyb o. Ma şar mecbur o ke reyanê xo bido to. Şima qeyûm bê zî serekê şaredarîye bê zî, mecbur ganî şarî rê xizmet bikerê.”

NÊHEQÎYE, ZUR, ÎFTÎRA

Buldane qiseykerdişê xo wina domna: ”Nê welatî bi dizdîye, bi nêheqîye, bi zur û îftîrayan îdare kenê û no wina nêbeno. Ma yew îqtîdaro ke her roj HDP’yî rê û parlamenteranê ey rê xeberan vano, nêheqî keno de ameyê têrî. Welatî bi nê qeydeyî îdare kenê. Ti hende wextê xo bi zuran, îftîrayan û nêheqîyan xerc kenî, heyf o, nê wextê xo seba ke şarî rê xizmet bikî xerc bike. Ti ke wina bikerdêne no şar hende feqîr nêbîyêne.

AKP DEMÊ XO YÊ PEYÊNÎ DE YO

Şarê Tatos û Erziromî zano ke mezela Şêx Seîdî çin a. Şêx Seîd seba Erziromijan erjêko pîl o û şar wazeno ke cayê mezela ey bimuso. No şar nê wazeno. Wazeno ke krîzê ekonomîyî ra, feqîrîye ra raxelesîyo. Ferasetê îdarekaran ê şaşî ver welat de zîreet û heywankarîye qedîyaye. Zaf nêmend, ma do 31’ê Adare de şaredarîyanê xo peyser bigîrê. AKP demê xo yê peyênî cuyeno.

KANÛNANÊ XO BÎYARÊ CA

Leyla Guvene û 300’yî ra zêderî girewteyê hepisxaneyan,125 rojî yo ke grevê vêşanîye de yê. Amed de zî embazê ma yê parlamenterî Tayyîp Temel, Murat Sarisaç û Dersîm Dage kewtê grevê vêşanîye. No îqtîdar çira nêperseno, çira nêvano no hende merdim çira hende wext kewto grevê vêşanîye! Problemê tecrîdî esto. Şarê min o hêca, no welat de, Îmrali de tecrîd esto. Ocalanî ser tecrid esto. Keye û avukatanê xo nêeşkeno bivîno. No hem hetê hiqûqî ra hem hetê wijdanî ra çiyêko rast nîyo. Şima qanûnê ke bi destê xo viraştê, bi xo kenê binpay. Ez tîya ra venga Wezîrê Edaletî dana. Tecrîd problemê pêroyê merdimahîye yo. Goreyê qanûnan tê bigêrê û tecrîdî wedarnê.”