Serrgêra 9. ya Qirkerdişê Roboskî de Goristanê Roboskî de vîrardiş ame kerdene. Hemsereka Pêroyî ya HDPyî Pervîne Buladan û xeylêk wekîle partîye,Vervatoxa HDKyî Îdîle Ugurlu, Hemserekê KCDyî Berdan Ozturk, Hemserekê DBPyî Salîha Aydenîz û Kesîn Bayindir tewrê vîrardişî bîyî.

Pervîne Buladana ke vîrardiş de qisey kerd nê vatî: ''Ez 34 gananê ma  ke nê qirkerdişî de cuya xo vînî kerde rê humayî ra rehmet wazena, wa sereyê keyeyanê ma yê dejnayeyan û ma pêroyînan weş bo.

Qirkerdişî 9 serrî xo ra dima verdayî û la no dejo pîl hema zerrîya  ma dejneno. Xora no qezayêk nêbi, qirkerdişo eşkera yo.  Dewlete, hukmatî bizanayîş û waştişî şarê Roboskî ser o bombayî varnayî. Tarîxê ma de qirkerdişê wînayên zaf ê. Nê koyî, kerrayî, merdimê ke tîya ciwîyenê vîrê nê prosesê dejî yê. Vîrê sucê merdimîye yê ke vera kurdan ameyî kerdene yê. Nê koyî, nê kerrayî vîrê dej, hesire û hersê. No vîr vîrê tarîxkî yê şarê kurdî yo. No qirkerdiş do çirey nêro vîrakerdene û hesabê ci bêro persayene.

Qirkerdişê sey Mereş, Dêrsim, Zîlane, Sûr, Cizîre, zî Qirkerdişê Roboskî ra cîya nîyê.  Tewr zaf zî dişmenîye û bêhuqûqîya vera kurdan ma mirnena. Rixmo ke yeno zanayene ke qerarê nê qirkerdişî kombîyayîşê MGKyî yê 28ê kanûna 2011î de ame girewtene û pê teyaranê şerî nê welatî 34 hemwelatîyî ameyî kiştene qetilkarî nêameyî cezakerdene. Qetilkarî ameyî pawitene û nêvejîyayî verê hukmî.

Ma do peyê nayî cameverdê û semedê caardişê edaletî çîyo ke destê ma ra yeno bikerê. O wext tay kêmîye ciwîyayî. Rîyê evrakanê kêman ra Mehkemeya Qanûnê Bingeyî dosya qebul nêkerd. Keyeyan dewa kirişte Mehkemeya Heqanê Merdiman a Ewropa (MHME) la înan zî vat seba ke rayîrê huqûqê zereyî girewteyî ê zî qebul nêkenê. Eşkerayo ke Baroyê Şirnexî o wext na mesele de zaf kêmîye kerde. Ganî selahîyetdarê baroyî yê o wextî berpirsîyaran vejê werte. Xora sey HDPyî ma zî hetê huqûqî ra kêmî mende. Ma reyna soz danê ke ma do peyê na dewa camevêrdê. No têna dejê nê keyeyan nê dejê ma pêroyînan o.

Nika qerarê MHME yê derheqê Selahattîn Demîrtaşî dosyaya Roboskî zî tede pêro bêhûqîyanê Tirkîya eleqedar keno. Pîya bi nê qerarî ma eşkenê pêro neheqîyê û bêhuqûqîye ke kurdan rê bîyî telafî bikerê. Coka ma tîya ra reyna venga îradeyê sîyasîyî danê. Şima mecburêke nê pelî reyna abikerê. Na mesele do tarîtîya Anqara de nêmano.

Qetilkarî nê herinda nînan de keyeyê Roboskî ameyî cezakerdene. Domanê nê keyeyan ra Ferhat Encu bi serran zîndan de mend.Velî Encu nika zîndan de yo. Êyê ke qetilkaran pawenê û ceza danê mexduran wa bizanê ke eke nê welatî de qetilkar û terorîstî yenê cigêrayene wa agêrî biewnîyê înanê ke Qirkerdişê Roboskî kerdî ra.''