Hemsereka Pêroyî ya HDP'yî Pervîn Bûldane bi wesîleya roşanî şîye serdana rêxistina HDP’yî ya Îdirî û Şaredarîya Îdirî.

Bûldane da zanayene, roşan emser roşanêko cîya bi û bale ante serê xoverdayîşê vera tecrîdî û vat, “Teyna grevê vêşanîye ney, rojeyê mergî zî ameyî kerdene. Hêvî kerd, xo ver ro da û ser kewtî.”

Bûldane ard ziwan ke tecrîd teyna problemê Kurdan nîyo, eynî wext de problemê şaranê hemeyê Tirkîya yo û vat, “Tecrîd teyna Îmraliyî de ney, her cayê Tirkîya ra vila bîyo.” 

Hemsereka Pêroyî ya HDP'yî da zanayene, bi saya xoverdayîşê grevê vêşanîye tecrîd ame şiknayene û şîyayîş û ameyîşê Îmraliyî dest pêkerd û vat, “Ma destpêk ra nata vanê, key ke Ocalanî reyde pêvînayîşî bêrê kerdene, vayê aramî, aşitîye û hêvîye Îmraliyî ra berz beno û welat ra vila beno.  Key ke tecrîd esto, destûr nêno dayêne ke avûkatê Birêz Ocalanî şorê Îmrali, bêhêvîye û welat de hewayêko cîya esto. Seba naye zî ma vanê ganî tecrîd qetî bêro wedaritene. Heya, gamêk ameya eştene û keyeyî û avûkatî şîyî û ameyî. Tecrîd tayê ameyo wedaritene. Seba ke tecrîd reyêka bîne nêkewo rojdemê Tirkîya, sere de hevalê ma yê ke grevê vêşanîye de bîyî, ma û şarê Kurdî û cimatê Tirkîya ney rojdemê xo ra nêvejenê.”