28ê êlule de herêma Herekolî ya Sêrtî de şer qewimîyabi. Şer de 5 gerîlayê HPGyî şehîd bibî ke înan ra yew zî Abdullah Koçak bi. Dima ke keyeyê ci pê hesîya seba ke cenaza bigêro şi nêweşxane. Babî Mehmet Alî Koçak 29ê êlule de seba ke cenazaya lajê xo bigêro seba testê DNA gonîye daye. La verî ke netîceya testî eşkera biba 2ê teşrîna verêne de cenaza Goristanê Zevye de ameye definkerdene. Netîceya testî 40 rojan ra dima eşkera bîye. Keyeyê Koçakî seba ke cenazaya xo bigêro do muracat bikero.

Babî Koçakî da zanayene ke dima ke ey gonî daye tim aqîbetê netîce persa û ci rê ame vatene ke cenaza morg de ya. Babî Koçakî seba ke cenaza bigêro muracatê Serdozgerîya Komare ya Sêrtî zî kerd. Babî Koçakî vat: ''Cewab nêame. Ez wazena cenazaya xo defin bikera. Ceanzaya lajê mi 2ê teşrîna verêne de goristanê bêkesan de ameye definkerdene. Çira nêverdenê ma cenazaya xo defin bikerê. Merdim qet cenazayan rê wina keno?''

 Koçakî pare kerd ke cenazaya lajê ci rê zulm ameyo kerdene û venga her kesî da ke verê hêrişanê vera cenazayan bigêro.