Mahsum Pamay o 22 serre, hepisxaneyê Girewteyî yê Tîpê F’yî yê Xarpetî de girewte bi. Pamayî seba ke tecrîdê serê Rayberê Şarê Kurdî Abdullah Ocalanî protesto bikero çalakîya fedaîye kerde û cenazeya ci qezaya Cizîre ya Şirnexî de ameye definkerdene. Cenazeya Pamayî hetê keyeyê ey û parlamentera HDP’yî Nuran Îmîre ra teslîm ameye girewtene. Rayîrê Cizîre û Nêweşxaneyê Dewlete yê Cizîre hetê hêzanê ewlehîye ra ameyî girewtene.

Cenaze saetanê serê şewdirî de ameye Nêweşxaneyê Dewlete yê Cizîre û polîsan nêweşxane girewt binê abluka. Parlamenterê HDP’yî Hasan Ozguneş û Huseyîn Kaçmaz zî ameyî nêweşxane la polîsan gefî wendî û vat eke nêweşxane ra nêvejîye ê do cenazeye megîrê nêweşxane. Naye ser parlamenterî, seba ke keyeyê Pamayî zor de nêmano vejîyayî teber. Peyê cû cenazeya Pamayî berde morgê nêweşxaneyî.

Şutişî ra dima keyeyê Pamayî cenaze berde Goristanê Esrî yê Cizîre. Dormeyê goristanî hetê polîsanê têgêrayîşê taybetî ra ame girewtene û goristan bi wesayîtanê zirxinan girewt binê abluka. Polîsan keyeyê Pamayî ra dot nêverda ke kes beşdarê wedaritişê cenazeye bibo.

Eqrebayanê keyeyê Pamayî reaksîyon da û polîsan ra va: “Ma domanê şima çin ê?  Zerrîya ma vêşena. Ma wa û biratîye wina ya? Ma no edalet o?”