Qezaya Sûrî ya Amedî de Pasajê Mehmet Xanî pê bira Wezaretê Dorme û Şaristanan hê yeno rijnayene. Bire ra dima ceyran û awa dikananê pasajî birîyaye. Vizêr zî 50 esnafanê pasajî ra ame waştene ke dikanan veng bikerê.

Rixmo ke esnafî seba ke vengê xo bidê eşnawitene xîret kenê hema zî derheqê mesele de gamêke nêerzîyaye. Esnafan twitter de hesabêk akerd û qeyûmê Şaredarîya Amedî û Walîyê Amedî rê mesajêk da.

Mesaj de bale ameye antene ser ke pasaj 4 serrî verî bîyo mulkê umûmîye. Mesaj wina dewam keno: ''Ewro yeno waştene ke ma dikananê xo veng bikerê. Na rewşa pandemî û zimistanî de cayêk çin o ke şorê ci.''

Esnafan mesajê xo de pare kerd ke qedexeyê tebervejîyayîşî yê Korona de ê nêeşkenê dikananê xo zî bihewilnê. Esnafan ard ziwan ke birîyayîşê awe û ceyranî înan rê zehmetîyan virazeno û da zanayene ke Walîtîya Amedî rixmê hende xîretan zî înan reyde pêvînayîşêk nêkerd.

Esnafan venga walîtîye da ke randevu bida înan.