Dewa Asgirekî ya qezaya Pilemurîye ya Dêrsimî de cinîyê bi nameyê Leyla Keskîn û Besere Aslan  pê heywankarîye debarê xo kenê; pendîr, rûn û tantûr virazenê roşenê.

Leyla pêro emrê xo de dewa xo de ciwîyaye. Leyla hem heywankarîye kena hem zî şiwanîye.Leyla vana: ''Axpînê ma çin o. Ma pê heywananê xo debarê xo kenê. Ma pendîr, rûn û tantûr virazenê roşenê. Pê pereyê înan zî ma hewcedarîyanê xo û ê heywananê xo peyda kenê. Ma seba zimistanî ardan û werdê xo hêrînayî kerdî nar. Ma zimistanan ge ge şinê merkezê şaristanî û o çax zî beno ke têna sebze-meywe bigêrê. Wa merdimî abigêrê dewanê xo. Dewan de her çi xozayî yo.

Besere zî heywankarîye kena. Biz, kerg û mêşnayê Besere estê. Besere vana: ''Ma pendîr, tantûr û rûnê xo dewijanê bînan rê û şarê ma yê welatê teberî rê roşenê. Ma heywananê xo roşenê û pê ê pereyî xo devirnenê. Zimistanan tay zehmetîyî benê; rayîrî qegilîyenî, ceyran birîyeno. Nînan ra ber yew zehmetîya ma çin a. Dewa ma zaf rind a; hewayê ci pak o, awa ci zelal a. Eke ma hîna weş ê aw û hewayê dewe ra yo. Hînî şaristanan de cuye nêmenda. Wa her kes abigêro dewa xo.''