Cinîyanê Dêrsimî 21ê Sibate Roja Ziwanê Dayîke ya Dinya de veng da ke kirdî wayîrê ziwanê xo vejîyê.

Dayîke Hatîce Guler (60) pare kerd ke  Cuntaya 12ê Êlule ra dima xeylêk kesan Dêrsimî ra koç kerd û nika kulturê înan binê tehlukeyê çinbîyayîşî de yo. Dayîke Hatîce vat: ''12ê Êlule ra dima tedayanê dewlete ra ma xo rê şîyî şaristananê bînan. Dima ziwanê ma, kulturê ma, bawerîya ma pêro ameyî vîrakerdene. Ma wazenê domananê ma ziwanê ma bimusê. Almanya de Fransa de ziwanê ma fermî yo la çira tîya de wina nîyo? Ê domananê ma asîmîle kenê. Yew ziwanê ma mendo wa ey zî çin nêkerê. Eke ziwanê ma vîr a şoro ma do pêro çin bibê.''

Hatîce Turkmez zî eşkera kerd ke a rixmê pêro tedayan zî bi kirmanckî qisey kena û ziwanê xo vîr a nêkena. Hatîce Turkmez vat: ''Rixmê hende tedayan ma hema  zî bi ziwanê xo qisey kenê. Eke ma xo vîr a nêkerd ganî neslê bînî zî bi ziwanê ma qisey bikerê û wayîrê ziwanê ma vejîyê.'' 

Elîfe Yalniz zî ard ziwan ke ê pêro waranê cuye de bi ziwanê xo yê dayîke qisey kenê û vat: ''Dêrsim de cinîyî tirkî bizanê zî tim bi kirmanckî îbadet kenê. Ma vanê 'Ya Xizir, ya Duzgun Baba, ya Munzur Baba' û destê xo dergê tîje kenê. Ganî şarê Dêrsimî naye hol bizano. Wa ziwanê ma destî ra nêşoro.'' 

 Yuksele Kasun îfade kerd ke a qetî kirmanckî ra ber bi ziwanêkê bînî qisey nêkena û 3 domananê xo reyde zî bi kirmanckî qisey kena. Yuksele vat: ''Kênaya mi bi ziwanê xo qisey kena la embazê ci aye fam nêkenê. Wa her kes domananê xo reyde bi ziwanê dayîke qisey bikerê. Wexto ke ma şinê nêweşxane ma nêeşkenê doktoran rê derdê xo vajê. Çunke ê ziwanê ma nêzanenê. Wa doktorî zî mamostayî zî ziwanê ma bizanê û qisey bikerê.''