Rêxistina HDPyî yê Cizîre vera tecrîdê serê Rayberê Şarê Kurdî Abdullah Ocalanî û baleantişê serê xoverdayîşê zîndanan çalakîyêke organîze kerde. Polîsan destûrê çalakîye nêda la şar  pîya bi wekîlanê xo peyser game nêeşte.

Verê çalakîye banê HDPyî gerîya binê ablûqa. Heme îdarekarê partîye û merdimê tepişteyanê ke ameyî banê partîye polîsan nasnameyê înan Arêdayîşê Hayîdarîyanê Pêroyîyan (GBT) ra ravêrnayî. Seba ke polîsan destûr nêda verê berî de eşkerayîye bide mabênê înan û Wekîla HDPyî ya Şirnexî de pêrodayîş vejîya. Îmîre û wekîl Hasan Ozguneşî vera ablûqaya polîsan hêrsê xo ard ziwan û şîyê verê berê Qeymaqemîya Qeza û tîya eşkerayîye daye. Polîsan reyna hêriş kerd destûr nêda û nêveda rojnamegerî zî biancê.

Îmîra ke tîya qisey kerd vat: ''Ma vera faşîzmî milê xo çewt nêkenê. Ma wayîrê Îradeyê xo vejîyenê û vengê xo berz kenê. Ma nê zext û hêrişan şermezar kenê. Îqtîdar sûcê merdimîye keno. Pê keyfê xo tepişeno erzeno zîndan û  zext û faşîzmî ano ca. Bi seyan cinî û ciwanî ewro bîlasebeb zîndanan de yê. Destûr nêdîyeno tepişteyî keyeyanê xo de pêvînayîş bikerê û yenê surgunkerdene. Hukmatê AKP û MHPyî dişmenîye keno. Ma do çirey vera neheqîye bêveng mebê. VerVera nê zextan û tecrîdî tepişteyî grevê vêşanîye de yê. Ma gereka tepişteyanrê bibê veng.''

Bade eşkerayîye wekîlê HDPyî binê ablûqaya polîsan de kuçeyo tewr sixletî yê Cizîre yê Kuçeyê Orhan Doganî ra ver bi banê HDPyî rayra şîyî û veng da şarî ke wa wayîrê tepişteyan bivejîyo.

Verê banê HDPyî de wekîl Hasan Ozguneş eşkerayîya kilme daye. Ozguneşî ard ziwan ke seba ke destûrê eşkerayîye nêdîya înan rayraşîyayîş kerd û vat: ''No rayraşîyayîş bedelê se eşkerayîyan bi. Şima her war de cehd kenê ke verê ma bigerê la şima ser nêkewtî. Ne çeke ne kelemçeyê şima ne zî zîndanê şima nêeşkenê vengê ma bibirnê.  Ma eşiqê azadîye yê û ganê xo nê semedî ra danê. Şima bîlaheq wîna kenê. Verê sewdaya azadîye de qet dîktatoro faşîst û hacetê ci yê zulmî nêeşkenê vinderî. Tarîx şahîdê nayî yo. Ma do semedê grevê vêşanîye vengê xo berz bikerê.''