Serra 2015î de  wextê xoverdayîşê xoîdarekerdişî de qezaya Cizîre ya Şirnexî de xebatkarê weşîye Azîz Yural wexto ke xîret kerdêne hetkarîya cinîyêka birîndare bikero hetê sekbananê dewleta tirke ra kişîyabi. Xebatkarê weşîye Şehmuz Duran û Eyup Ergen zî sey Yural ameybî qetilkerdene. 3 xebatkarî zî bi merasîmêko ke hetê Sendîkaya Kedkaranê Weşîye (SES) ya Cizîre ra serûber bîyo serê goranê xo de ameyî yadkerdene. Keyeyê Yuralî, Hemserekê SESî Selma Atabey û Husnu Yildirim, xebatkarê weşîye tewrê merasîmî bîyî.

Hemserekê SESî yê Cizîre Umut Çîmenî merasîm de qisey kerd û vat: ''Ma do wayîrê mîrasê Azîz, Eyup û Şehmuzî vejîyê. Ma do vera ê kesanê ke wazenê tîje bikerê tarî têkoşîn bikerê.''

Hemserekê SESî  Husnu Yildirim zî wina vat: ''Embazê ma wexto ke wezîfeyê xo kerdêne ame qetilkerdene. Ma pêro embazanê xo yê nê oxirî de canê xo da bi rêzdarî yad kenê.''

Peynîya merasîmî de dûayî ameyî kerdene û qeranfîlî ronîyayî goran ser.