Hingdaranê Colemêrgî û herême ard ziwan ke rîyê çekanê kîmyewîyan ra ke serran ra nata şerê Vakurê Kurdîstanî de hetê dewleta tirke ra yenê xebitnenê bi mîlyonan hingî ameyî qetilkerdene û di serr ê ke bi hingdarîye nêeşkenê debarê xo bikerê.

Xozayê Vakurê Kurdîstanî wayîrê zengînîya tewir bi tewir ganîyan o. Koyanê Colemêrgî, Wanî, Agirî û Bedlîsî de bi seyan tewirî heywanî û vaşî estê. Hindarîye zî herême de çimeyanê debarî yê girîngan ra yew a. Hingimênê Colemêrgî, Bedlîsî û Wanî yo ke bi seyan nebatan ra yenê arêdayene hem Kurdîstan de hem zî Tirkîya de eleqayêko pîl vîneno û zaf yeno tercîhkerdene. La di serranê peyênan de hingdarîye hema hema qedîyaye. Sere de Colemêrg Vakurê Kurdîstanî de di serran de bi mîlyonan hingî ameyî merdî. Hingdaranê herême îfade kerd ke ê hînî tira zerar kenê.
Hingdaro ke qezaya Şemzînanê Colemêrgî de hingdarîye keno vat ke herême de bi mîlyonan hingî merdî û o di serran ra nata zerar keno. Hindarî wina dewam kerd: "Hinga Şemzînanî zaf ameyêne waştene la di serranê peyênan de hingî ma nişka ra merdî. Ma zerarêko pîl dî. Seba ke hingê ma merdî ma emser nêeşkîyayî hinge virazê. Seba ke koyê ma ser o bambayî yenê varnayene hingê ma mirenê.''