Merkezê Îrtîbatî û Çapemenîye yê HPGyî bi eşkerayîyêke nasnameyê hîrê şehîdan eşkera kerdî. Eşkerayîye wina ya:

''10ê kanûna 2022yî de warê Girê Ortê yê Metîna de hêrişê dişmenî de embazanê ma Arîne, Rênas û Serdarî cezakerdişê dişmenî û xoverdayîş de rolêko pîl kay kerd, bi qehremanî şer kerd û şehîd bîyî. Nê embazanê ma îsbat kerd ke milîtanê Apogîrî do tim cewabê hêrişan bidê, şarê ma tim bipawê. Nê embazanê ma bi nê hawayî sey şerwananê tewr qîmetînan ê şarê ma tarîx de cayê xo girewt. Embazê ma Arîne, Rênas û Serdar ê ke cayanê cîyayan ê Kurdîstanî ra yê, bîyî sembolê yewîya şarê Kurdîstanî. Nê şehîdê ma do tim vîrê şarê ma de bimanê û bibê sebebê zêdînayîşê têkoşînî.

Nasnameyê embazanê ma yê şehîdan wina yê:

Nameyê Qodî: Arîne Mîtan Name û Peyname: Îslîme Hiso Cayê Bîyayîşî: Qamişlo Maye-Pî: Rojher – Mahmud Tarîx û Cayê Şehadetî: 10ê Kanûna 2022yî / Metîna

Nameyê Qodî: Rênas Amed Name û Peyname: Huseyîn Seçkîn Cayê Bîyayîşî: Amed Maye-Pî: Saliha – Hasan Tarîx û Cayê Şehadetî: 10ê Kanûna 2022yî / Metîna

Nameyê Qodî: Serdar Rojhilat Name û Peyname: Sîna Şerifpur Cayê Bîyayîşî: Dîwandere Maye-Pî: Azîze – Mihemed Elî Tarîx û Cayê Şehadetî: 10ê Kanûna 2022yî / Metîna

Embaze Arîne Qamişlo de dadîya xo ra bena. Embaze Arîne verî Şorişê Rojawanî de cagêna û 2013 de zî xeyalê xo yê domanîye ana ca tewra gerîlayan bena. Embaze Arîne seba ke biba milîtanêka marîfetîne xo felsefeya Rayber Apoyî de aver bena. Embaze Arîne vera DAÎŞî têkoşîn kena û dima verê xo dana Herêmanê Pawitişî yê Medya. Embaze Arîne Metîna de Hemleya Şorişgêre ya Şehîd Savaş Maraşî ya Cengê Xabûrî de cagêna û sey şerwanêka YJA-Starî pêro erkanê xo bêkêmasî ana ca. A Girê Ortê de hêrişê dişmenî de bi qehremanî şina serê dişmenî û şehîd bena.

Embaz Rênas Amed de dadîya xo ra beno. Embaz Rênaso ke kekê ci û xeylêk merdimê ci şehîdê têkoşînî bîyî verî xebatanê ciwanan de cagêna û dima 2013 de tewrê gerîlayan beno. O perwerdeyê xo yê verênî Metîna de gêno û cade adapteyê cuya koyan beno. Dima Dibistana Operasyonî ya Şehîd Mehmet Goyîyî de perwerde gêno. O 2014 de vera DAÎŞî şer keno û dima agêreno koyan. Dima Akademîya Mahsum Korkmazî de perwerde vîneno. Embaz Rênas Garê û Heftanînî ra dima waştişê xo ser o derbazê Metîna beno. Metîna de Hemleya Cengê Xabûrî de sey feermandarêkî o serkêşîya xeylêk çalakîyanê serkewteyan keno. Girê Ortê de zî bêteredut têkoşîn keno û beno şehîd.

Embaz Serdar şaristanê Dîwandere yê Rojhelatê Kurdîstanî de dadîya xo ra beno.  Embaz Serdar cigêrayîşanê xo ra pey PKKyî şinasneno û tewrê gerîlayan beno. O warê leşkerî û îdeolojîkî de xo aver beno û şuxilnayîşê çekanê otomatîkan de beno pispor. Dima o derbazê Metîna beno û tîya de vera dişmenî bi fedakarî têkoşîn keno. Embaz Serdar Girê Ortê de mîyanê tîmanê verênan de cewab dano hêrişanê dişmenî û xeylêk leşkeranê dişmenî ceza keno. Embaz Serdar bêteredut şer keno û tewrê karwanê şehîdan beno.

Ma sere de keyeyanê înan ê ercîyayeyan rê pêro şarê ma yê welatperwerî rê serweşîye wazenê.''