Riha de 6ê teşrîna verêne de sereştişê keyeyan de Mayê Haştîye Hadle Ogur, Fatma akbaş, Adalete Çay û Meyasere Kokmaz ameyî destbendkerdene û 9 rojan nezaret de mendî. 3 Mayê Haştîye bi şertê kontrolê edlîyî vera dîyayî. Maye Adalete Çay do 'hepsê keyeyî' de bimana. Mayanê Haştîye ra Hadle Ogur û Meyasere Korkmaz derheqê nezaretê xo de qisey kerd. 

Hadle Ogur (49) pêro emrê xo de maruza tedayan bîye. Dayîke Hadle vat: ''Ez panc reyna ameya destbendkerdene, 7 mengan zîndan de menda. Mi zîndan de grevê vêşanîye kerd. Mi tim haştîye û wayûbiratîye waştî. Seba naye ma ameyî hedefkerdene. Dewlete mi rê gef wend Tewr peyên ez û mêrdeyê mi ma pîya ameyî destbendkerdene. Ma sey dadîyan zaf dejî antî. Wazenê ma teslîm bibê la no do qet nêbo. Zîndan de înan mi rê persa ke çira ez tewra cenazaya mayêka haştîye bîya. Eke tecrîdê Birêz Ocalanî nêro wedaritene haştîye zî azadîye zî nêna. 15 Mayanê Haştîye dinyaya xo bedilnaye. Nê mayan têna haştîye waştêne. Ma zî seba haştîye têkoşîn kenê.''

Meyasere Korkmaz (49) ard ziwan ke bi serran seba haştîye têkoşîn kerd û vat: ''Bîyayîşê mayêka haştîye rûmet o. Mayê Haştîye têna haştîye wazenê. Ez hîrê reyan ameya destbendkerdene. Derheqê mi de zaf reyî tehqîqatî ameyî akerdene. Rayêk ez 25 rojan nezaret de menda. Nezaret de polîsan mi rê persa ke ez çira şîya xeyma şînî. Ê nêwazenê ke Mayê Haştîye bêrê têkişt. Dadîya mi heta nefesê xo yê peyênî haştîye waşte û wina şîye rehm. Ez nêwazena naye biciwîya. Heta ke destê mi ra bêro ez do seba haştîye têkoşîn bikera.''