Wekîla HDPyî Dersime Dag bale ante ziwanê bingeyî yê komelî ser û vat: "Ziwanê kurdkî kulturê kurdan a ke se serrî yo ke esto. Îqtîdaran qet destûr nêda ke kulturêko nuştekî bibo. Coka ziwanê kurdkî têna mîrasê kurdan o. Ziwanê kurdkî pêro sîsteman û kayanê îşxalkeran û îqtîdaranê Kurdîstanî ra pîlêr o. Ziwanê kurdkî qirkerdişî ra pîlêr o."

''Dewlete tim tersaye ke kurdî do bibê azad. Senî ke kurdî bi hêvîya azadîye pîl bîyî dewlete zî bi nê hawayî bi tersê ney bîye pîl. La nika tersê aye vera hêvîya kurdan bêhêz o. Dewlete çend vera ziwanê kurdkî qedexeyî û astengî xebitnayî zî nêeşkaye hêz, zengînîye û qedîmîya kurdkî çin bikera."

"Ziwanê kurdkî bi di dîyalektîkanê xo (kirmanckî û kurmanckî) tim rastê polîtîkayanê asîmîlasyonî yê Tirkîya ame. Dewleta tirke zanayêne ke eke a bieşkayêne kurdan ziwanê xo ra dûr bivisna asîmîlasyon do ser bikewtêne. La kurdî wayîrê ziwan û kulturê xo vejîyayî."

''Ewro dezgehanê dewlete de kurdkî qedexe yo, dibistanan de kurdkî sey dersêke yena pêşkêşkerdene la reyna zî weçînayîşê ci qedexe yo. Dewlete nêverdana kurdî bi ziwanê xo pîl bibê. Metropolan de êyê ke kurdkî qisey kenê yenê kiştene."

Wekîla HDPyî ya Amedî Dersime Dag tewr peynî de vat dewleta tirke her ca de destê xo derg kena ziwanê kurdan û vat: "Seba ke Japonya destûr da ke kurdkî sey ders bêra dayene û bi kurdkî xebate bêra kerdene dewleta tirke bîye adir kewte Japonya.

Beno ke cayêk de nê polîtîkayê asîmîlasyonî yê dewlete bibê semedê azadbîyayîşê kurdan coka tewirêkê asîmîlasyonî yo xurt esto: êyê ke yenê asîmîlekerdene vera asîmîlekeran hîna zêdêr qerardar, bihêrs û tûj benê."