Zîndanan de bi hezaran kesî grevê vêşanîye ke semedê wedartişê tecrîdê serê Rayberê  Şarê Kurdî Abdullah Ocalanî, rayberîya Leyla Guvene de ameyî destpêkerdene, de yê. Merdimê nê xoverdayoxan zî teber ra paşt danê qijanê xo û wazenê ke tacrîd bêro qedînayene û çew memiro. Dayîkê xoverdayoxan ê ke Baroya Amedî de semedê paştdayîşê qijanê xo grevê vêşanîye de yê, derheqê waştişanê qijanê xo de qisey kerd.

Way-Biratîye Wina Ya?

Dayîkan ra Sacîye Dolane da zanayene ke lajê aye Agît Dolan serra 2016’î ra zîndan de yo û va: ‘‘Lajê mi 1’ê Adare ra nata Zîndanê Gîresûnî de grevê vêşanîye de yo. Wexto ke mi tewr peynî de dîyî moralê înan ca de bî. Eke qijê ma uca ra wazenê çîyêk bibedilnî, yeno no mana ke no welat de elalet çîn o. Serokkomar hema qîreno vano’Kurdî way, birayê mi yê‘ Way-Biratîye na ya? Eke raşta ma way-birayî wa vengê ma bieşnawo. Waştişê qijanê ma, waştişê ma yê.‘‘

Wa Vengê  MA Bieşnawî Û Tecrîd Wedarî

Nurten Gule zî ard ziwanê ke lajê aye Muhammed Gulo ke Zîndanê Tipê T’yî yê Amedî de yo, 1’ê Adare ra nata grevê vêşanîye de yo û wina va: ‘‘Mi çend rojî cuwa ver lajê xo û embazê ey dîyî. Rewşa weşîya înan bîya xirab. Lajê mi 10 kîlo dayî.Vanê ke heta tecrdî mero wedaretene ê do çalakîya xo rê dewam bikerê. Ma zî paşt danê qijanê xo û wazenê ke waştişê înan cade bêrê ca. Tecrîd heme şarî rê yeno kerdene û ganî bêro wedartene. Ma dayîkî nê wazenê hinî hesran war bikê. Wa vengê ma bieşnawî û tecrîdî cade wedarî. Heta ke waştişê qijanê ma mero ca, ma do cayanê cîya-cîyayan de çalakîyanê xo rê dewam bikerê.‘‘