Merkezê Pêroyî yê Partîya Herêman ê Demokratîkan (DBP)  derheqê şewatê Girawa Îmraliyî de ewro eşkerayîyêka nuştekîye kerde.

Eşkerayîye de ame parekerdene ke eşkerayîya Wezîrê Karanê Zereyî yê Suleyman Soyluyî ya ke vatene ''Meseleyêke çin a'' bêcidîyet û peygoşî ya. DBPyî ard ziwan ke şewatî û serebûtê ke dima bîyî înan qerqilnenê. Eşkerayîye wina dewam kena:''Derheqê na mesele de ma şarê xo ra nêrazîbîyayîşanê pîlan gênê. Ganî seba ke rewşe bêra roşnkerdene cade avûkatî û keyeyî şorê girawe, cayê serebûtî de babete teqîb bikerê û rayaumûmîye reyde zanayîşan pare bikerê. Ma wazenê bivisnê vîrî ke rewşa weşîye û asayîşî ya Birêz Abdullah Ocalanî sere de seba şarê kurdî seba pêro şaranê Rojhelatê Mîyanênî zaf girîng a.  Ma venga her kesî danê ke seba ke derheqê na babete de bi hawayêkê rastikênî rayaumûmîyî reyde zanayîşî bêra parekerdene berpirsîyarîya xo bîyaro ca.''