Şahîdanê peyênan ê Qirkerdişê Dêrsimî ra Dengbej  Suleyman Dogano ke sey ‘Silo Qiz‘ yeno zanayene vizêr şibi rehmet. Silo Qiz ewro  Dêrsim de ame definkerdene.

Cemxaneyê Paştdayîşî û Vilakerdişê Kurlturê Haci Bektaş Velîyî de merasîmêk ame viraştene. Merdimê Qizî, Şaredarê Dêrsimî Mehmet Fatîh Maçoglu, şaredarê qezayan, îdarekarê Partîya Demokratîke ya Şaran (HDP) yê bajarî, temsîlkarê rêxistinanê sivîlan û bi seyan kesî tewrê merasîmî bîyî.

Verê merasîmî eserê Qizî ameyî goştarîkerdene û bado zî derheqê cuya ey de ame qiseykerdene. Qiseykerdişan de ame vatene ke nameyê ey sey qicî bêro zanayene zî esle xo de o hozanêko namdar û gird o.  Ewro eke derheqê tarîxê kirmanckî, ziwan, kultur û bawerîye ma de çîyêk ma destê mendo no xeyrê nê hozanan ra yo. Merasîmî ra dima cenazeya Silo Qizî dewa Mîlû ya Dêrsimî de ameye definkerdene.