HDPyî çarçewa Kampanyaya 'Vera faşîzmî xoverdayîş, şaran rê edalet û demokrasî' de qezaya Depî ya Xarpêtî de kombîyayîşêkê şarî kerd. Kombîyayîşo ke hetê Rêxistina HDPyî ya Depe ra ame serûberkerdene, Wekîlê HDPyî yê Çewlîgî Erdal Aydemîr û Endamê Meclîsê Partîye yê HDPyî Murat Aydin tewrê ci bîyî.

Murat Aydinî kombîyayîş de qisey kerd û ard ziwan ke rayraşîyayîşê sîyasetê demokratîkî dewam keno. Aydinî bale ante ser ke ganî şar zêdêr wayîrê kampanyaya înan vejîyê. Aydinî venga pêro hemwelatîyan da ke vera tecrîd, talanê ekolojîkî û bêusûlîye têkoşîn bikerê.

Wekîlê HDPyî yê Çewlîgî Erdal Aydemîrî zî îfade kerd ke krîzo ekonomîk û sîyasî bîyo giran û vat: ''Ma dî ke prosesê pandemî ra dima hukmatê AKP-MHPyî bin kewt û hînî nêeşkeno welat îdare bikero. Eşkera yo ke ê do weçînayîşê bînî de qetî îqtîdarî ra bikewê. Ma pêro elewî, kurd, ekolojîst, bindest, kedkar, karker, ciwan û cinîyan dawetê têkoşînî kenê.'' 

Hetê bînî ra qezaya Îskenderunî ya Hatayî de zî bînaya partîye de kombîyayîşê şarî ame kerdene û Wekîlê HDPyî yê Adana Kemal Peksoz, endamê partî û xeylêk hemwelatîyî tewrê kombîyayîşî bîyî. Pekozî derheqê teda û zorbazîya vera HDPyî de qisey kerd û pare kerd ke rixmê nê çîyan zî têkoşînê HDPyî dewam keno.