Dêrsim de ciwanan waşt Taxa Gazîkî de şayîya Newroze fîraz bikerê la polîsan destûr nêda. Naye ser o ciwanan bi rayraşîyayîşêk  polîsî protesto kerdî.

Wekîlê HDPyî yê Dêrsimî Alîcan Onlu û hemserekanê partîye yê bajarî Ferhat Yildiz û Nazli Çelîk Oz zî paştî daya ciwananê ke waşt adirê Newroze tafînê.

Ciwanan waşt taxe de adir tafîne la polîsan destûr nêda. Polîsan bi wesayîtanê zirxinan û TOMAyan warê Newroze girewt binê ablûqa û waşt wa ciwanî cadê vila bî. Polîsan anons kerd û vat eke şima vila mebê ma do zor bişuxulne.

Ciwanan hêrişê polîsan protesto kerd û bi sloganan dest pê rayraşîyayîşî kerd.  Ciwanî bi slogananê ''Zextê nêeşkenê verê ma bigêrê'', ''Newroze fîraz bo'' û Ma do bi xoverdayîşî ser bikewê qîrayî. Dorme ra  şarî zî pê çapikan paştî daye ciwanan.