Bi wesîleya 1’ê Êlule Roja Haştîye ya Dinya Dêrsim de hetê Hêzanê Kede û Demokrasîyî ra rayraşîyayîşêk ame organîzekerdene. Bi seyan Dêrsimîjî tewrê çalakîye bîyî û waştişê haştîye ard ziwan.

Dêrsimîjê ke Kuçeyê Hunerî (Sanat Sokagi) de ameyî têhet ver bi Meydanê Seyîd Rizayî rayra şîyî. Cinîyanê ke laçigê sipîyî yê ke sembolê haştîye yê atnê xo rayraşîyayîşî rê rayberîye kerde. Pîya bi parlamenterê HDP’yî yê Dêrsimî Alîcan Onlu yî xeylî temsîlkarê partîyanê sîyasîyan, îdarekarê rêxistinanê cimatê sivîlî û bi seyan kesî tewrê ci bîyî. Rayraşîyayîşo ke sloganê haştîye berz bîyî de  qeyûmî zî ameyî şermezarkerdene. Dimayê rayraşîyîşî Meydanê Seyîd Rizayî de deqayêk semedê şehîdanê mucadeleyê haştîye rêz ame girewtene. Bado zî eşkeryîyêk ameye dayene. Eşkeryîye de bale ameye antene serê polîtîkaya hêrişkare ya hukmatî û rixmê naye ame waştene ke wa seba haştîye gamî bêrê eştene. Reyna qeyûmî zî ameyî şermezarkerdene û  ame vatene ke şarê Kurdî do bi xoverdayîşî şaredarîyanê xo pêser bigêro. Eşkerayîye ra dima Alîcan Onlu roja haştîye ya şaran fîraz kerde û semedê xurtkerdişê muceleyî veng da. Çalakîye bi deyîranê hunermend Yilmaz Çelîkî qedîyaye.