Rêxistina HDPyî waşt ke verê banê partîye de derheqê tecrîdê serê Rayberê Şarê Kurdî Abdullah Ocalanî û grevê vêşanîye yê tepişteyan yo ke di mengî xo dima verdayî de eşkerayîye bido la polîsan destûr nêda. HDPyîjan eşkerayîye verê berê dekewtişê banê partîye de da. Eşkerayîye de pankarta Wa waştişî bêrê ca, grevê vêşanîye biqedîyo ameye akerdene.

Hemsereka HDPyî ya Dêrsimî Nurşat Yeşîl vera astenkerdişan nêrazîbîyayîş ramojna û vat hukmatî rê her çî serbest o la vengê muxalefetî bi bahaneyê janî yeno birnayene.

Yeşîle vist vîrî ke grevê vêşanîye yê zîndanan roja 63. de yo û vat: ''Zîndanan de xora rewşe xirab bî, badê pandemî dilab-hîrlab xîrabêr bîye. Destbendkerdiş û tepiştişan de cigêrayîşê zitî zêdîyenê. Hînî her hetî ra merdimî derheqê nê de qisey kenê û çîyê ke ameyî serê înan eşkera vanê. Înfazî peyde erzîyenê, tepişteyê ke cezaya înan bîya de zî verdayîşê înan peyde erzîyeno. Heqê tedawîkerdişî yeno astenkerdene. Îmrali de xeylêk wexto tecrîdo giran esto. Waştişê tepişteyan ra yew zî wedaritişê tecrîdî yo.Wa waştişî bêrê ce û grevê vêşanîye biqedîyo. Gereka ma cuye bipawê ke zîndanan de rewşe xirabêr nêbo. Coka tîya ra vengê xo kenê berz.''