Eşkera bi ke Serekê AKPyî yê qezaya Pilemurîye ya Dêrsimî Çagnur Kiliçogluyî dîrekê ceyranî cêra kerdî û darê daristanan birnayî berdî. Dima ke dewijan gerre kerde Kiliçoglu serê dizdîye de ame dîyene.

Rêxistina HDPyî ya Dêrsimî derheqê mesele de  eşkerayîyêke daye û nêrazîbîyayîşê xo mojna. HDPyî ard ziwan kerd ke meseleyanê winasênan de kesê sey Kiliçogluyî xîret kenê ke pê nasnameyê xo yê sîyasî serebût mîyan bikerê û vat: ''Ma heta nika vera talan û xeripnayîşê xozaya xo bêveng nêmendî û naye ra pey zî ma do bêveng nêmanê. Seba ke mesuldarê nê serebûtî bêrêcezakerdene û serebût nêro mîyankerdene, ma do mesele teqîb bikerê.''