Nêrazîbîyayîşê vera polîtîkaya qirkerdişî ya vera Dêrsimî dewam kenê. Hemserekê HDPyî yê Dêrsimî Îbrahîm Kasumî vera tarîqatanê ke Dêrsim de yenê cakerdene hêrsê xo ard ziwan.

Kasumî vist vîrî ke tarîxî ra vera Dêrsimî polîtîkaya asîmîlasyonî yena reyraberdene û vat: ''Wazenê ke nasname û kulturê Dêrsimî çîn bikerê. Dewanê elewîyan de camîyan virazenê. Wendakarê elewî lîseyanê îmam hatîpî de yenê cakerdene û yenê berdene kusanê Quranî. Şarê Dêrsimî nê camîyî veng verdayî û vera înan tewirê ramojna. Senî ke serranê 90an de cematê Gulenî tîya kreşî akerdî û waşt ke xo ca bikero ewro zî bi cematî bi rayîrê Unîversîteya Munzîrî xo tîya ca kenê. Unîversîteya ke ganî cayê zanîstî bo, bîya cayê tarîqatan. Ganî heme netew, ziwan, kultur û îtîqatan rê hurmet bêro ramojnayene. Ziwanê ma kurdkî yo û bawerîya ma elewîtîye ya. Ganî no bêro qebulkerdene, ci rê hurmet bêro ramojnayene û polîtîkaya asîmîlasyonî bêro vindarneyene.''

Serekê CHPyî yê Dêrsimî Alî Mustafa Çelîkî zî vera tarîqatanê ke Dêrsim de ameyî cakerdene nêrazbîyayîş ramojna û vat tarîqatî nêeşkenê komelê elewîyan de biciwîyê.