Dêrsim goreyê doneyanê Dezgehê Îstatîstîkî yê Tirkîya (TUÎK) yê 2019î şaristananê tewr xizanan ra yew o. Dêrsimijan derheqê babete de qisey kerd û venga hukmatî da ke wa paştî bido Dêrsim.

Kamer Bulutî vat: ''Çew paştî nêdano ma. Ciwanê ma bêkar ê. Wa dewlete dest bierza ma.''

Haskare Bulut vat: ''Mêrdeyê mi teqawut bi coka ma nêeşkenê xo bidevirnê. Domanê ma miqatê ma benê.''

Suleyman Aytaçî vat: ''Dêrsim de ekonomî çin a. Paştî nêdîyeno esnaf û citkaran. Şaristanê ma binê tesîrê nê krîzî de maneno.''

Haydar Aslanî vat: ''Her çi zaf vay o, ma nêeşkenê çîyêk bihêrînê. Dewlete budçe nêdana ma.''

Dîlane Argin vat: ''Ciwanî nêwazenê tîya de bimanê. Dewlete zî tîya de warê îstîhdamî anêkena. Fabrîkayî çin ê. Coka ciwanê ma şinê.''

Sezaî Yildizî vat: ''Esnafê ma sîftah nêkenê. Dewlete vera esnafan ra vergî gêna. Tîya de ne fabrîka esta ne zî merkezê berardişî esto.''