Wendekara Zanîngehê Munzurî yê Dêrsimî Gulîstane Doku 5ê çeleyê 2020î serrêke ra nata vînbîyaye ya. Dêrsimijan derheqê serebûtî de qisey kerd û nêrazîbîyayîşê xo ardî ziwan.

Hemwelatîyê bi nameyê Ahmet Çakarî vat: ''Dêrsim cayêko qij o la tede cinîyêka ciwane kişîyena. No cara ma dejneno. Ma wazenê ke no serebût wa bêro roşnîkerdene.''

Hemwelatîyê bi nameyê Serkan Sariataşî vat: ''Bîye serrêke ke Gulîstane dîyaye vînîkerdene.Eke dewlete biwaza eşkena na mesele roşnî bikera.''

Haydar Balî vat: ''Dêrsim de qaşo asayîş zêde yo. Tîya de milçîkêk zî bifiro çew pê hesîyeno. La merdimêke serrêke ra nata vînbîyaye ya û tira xeberêke nêna girewtene. Ê nê serebûtî ser o nêvindenê, nêwazenê mesele roşnî bikerê. Asayîşê ma zî çin o. Eke siba nê bîr aqîbetê domananê ma zî wina bibê ma do kamî ra hesab bipersê? Ma hêvî kenê ke no serebût do eşkera bibo.''

Zeynepe Altun  vat: ''Gulîstane ra serrêk a xeberêke çin a. Tehqîqat senî dewam keno ma nêzanenê. Têna awe de gêrîyaye ci.''

Pinare Tan vat: ''Ez wina fikirîyena ke Gulîstane xo nêkişta. A kişîyaya. No prosesêko zehmet o. Her kes ho hêvîya Gulîstane de yo.''

Hemwelatîya bi nameyê Sevda zî wina vat: ''Xora cigêrê merdimanê Gulîstane vêşeno. Mi sey yew cinîye fam kerd ke eke ma rê çîyêk bibo heqê ma nêno persayene û ma nêpawîyenê.''