Dewa Beroçî ya qezaya Mazgêrdî ya Dêrsimî de qoricîyî şarî rê gef wanenê û nêverdenê şar şoro wareyan. Dewijan derheqê mesele de PÎRHA rê qisey kerd.

Muxtarê dewe Duzgun Şahanî vat: ''Ma daristanan ra gêrayêne. Kesê bi nameyê Aga Yildirimî gerreyê ma kerd û vat ma daristanî texrîb kerdî. Derheqê ma de dewa ameye akerdene. Qoricîyê koçerî heywananê xo her ca de çerênenê ma rê cayêk nêverdenê.''

Ayhan Ozdemîrî îfade kerd ke xozaya înan yena texrîbkerdene û vat: ''Ma dewa xo de nê qoricîyanê koçeran nêwazenê. Wa selahîyetdarî vengê ma bieşnawê. Qoricî aga Yildirim û merdimê ci wa dewa ma ra şorê.''

Huseyîn Ozdemîrî vat: ''Verî zî înan pesê xo ardî dewa ma. Heywanê înan zerar danê xozaya ma. Wa dewlete vengê ma bieşnawa. Ê ma rê gefan wanenê vanê 'peyê ma de dewlete esta.' ''

Dewijan Înan Ozdemîrî û Gurkan Kaplanî zî ard ziwan ke qoricîyî aramîya dewe xeripnenê û ê înan nêwazenê.

Dewija bîne Aytene Şahîn vat: ''Ma pesanê înan dewa xo de nêwazenê. Cara vaşê ma heywananê ma rê bes nîyo.''