Dêrsimijî roja peyêne ya Çarşemeyê Reşî de Gola Çetuyî de bîyî
Dêrsimijan roja peyêne ya Çarşemeyê Reşî de Zîyaretgehê Gola Çetuyî de çerayî vistî ta loqmayî vila kerdî.
Goreyê Elewîtîya Raya Heqîye ya Dêrsimî adara ke sey 'menga Xizirî' zî zanîyena hîrê çarşemeyê ci yê verênî sey 'Çarşemeyê Reşî' qebul benê.
Çarşemeyo Reş heman wextî de sey destpêkê wisarî hesibîyeno. Nê rojan de keyeyan û cayanê fîrazan de çerayî yenê tavistene, qurbanî birîyenê û loqmayî yenê vilakerdene. Dêrsimijî nê rîtuelan de wazenê ke serre hol derbaz biba û xirabîyî def bibê.
Vizêr zî mabênê Layê Munzurî û Pilemurîye yê Dêrsimî de roja peyêne ya Çarşemeyê Reşî de roniştoxanê şaristanî Zîyaretê Gola Çetuyî de çerayî vistî ta loqmayî vila kerdî.
