Qezaya Kerboranî ya Mêrdînî de 29ê teşrîna verêne ya 1996î de 3ê ci domanî 8 kesê dima ke dest bend bîyî ameybî qetilkerdene. Roniştşê 20. yê dewa Mehkemeya Cezaya Girane ya Semsûrî de ame kerdene.

Avûkatê mexdûran Erdal Kuzu û Azîz Turk tewrê roniştişî bîyî. Mamosta Dîlek Tok zî sey şahîde bi rayîrê SEGBÎSî tewra mehkeme bîye.

Haznî Doganî pare kerd ke birayê ci Seyhan Dogan, zamayê înan Abdullah Olcay û Abdurrahman Coşkun dîyayî vînîkerdene û vat: ''Wexto ke ez ameya destbendkerdene 11 serre bîya. Wa hînî edalet bêro caardene. Birayê mi wesayîtê leşkerî de bi. Ma zî dekerdî uca. Zamayê ma Abdurrahman Olcay zî wesayît de bi û kincê leşkerî yê kamuflajî serê ey de bîyî. Înan ma pêro kerdî zût, ez zî berda hetê birayê mi. Uca de ma rê îşkence kerd. Dadîya mi çenda caran şîye fermandarê cendirmeyan Mehmet Tîre, birayê mi persa. Dadîya mi dima şîya qereqolê Mîdyadî. Uca de ameye destbendkerdene. 35 rojan nezaret de mend. Wexto ke nezaretî ra vejîyaye 95 rojan ra dima şîye rehm. Wexto ke ma cenazayê merdimanê xo dîyê, tayê înan sereyê înan ameyî qerifnayene û vêşnayene. Ma wazenê berpirsîyarî wa ceza bigêrê.''

Avûkat Erdal Kuzuyî îfade kerd ke nê 8 kesî hetê dewlete ra kişîyayî. Kuzuyî vat: ''8 kesî zî pê guleyêk kişîyayî. Ma hol zanenê ke no metodê JÎTEMî yo.  Dozgerê Kerboranî ganî bêro goştarîkerdene. ''

Mehkeme bire daye ke adresê dozgerê kerboranî yê ê çaxî Adem Kulî bêro tesbîtkerdene û roniştiş taloqê 29ê adara 2021î kerd.