Roniştişê Dewaya Nisêbînî yê 70 kesan dewam keno ke  17ê ci domanî nê 70 kesî 26ê gulana 2016î de xoverdayîşê xoîdarekerdişî yê Nisêbînê Mêrdînî de amebî destbendkerdene û dima amebî tepiştene.

Çarçewa hukmkerdişî de roniştişê 6 kesan ame dîyene.

Verên roniştişê Mehmet Zîrîgî ame dîyene. Mehkeme bi îdîya 'Xerakerdişê yewîya dewlete û yewparetîya ci' cezaya muebede ya girane daye Zîrîgî. Her wiha mehkeme bi îdîaya 'bi zanayîşê xîretkerdişê kiştişî' 15, bi îdîaya 'zîyandayîşê keyeyê komelî' 2 serre cezaya zindanî dayî Zîrîngî. Zîrîngî dima ke cezaya ci ameye eşkerakerdene sloganê 'Biciwîyo Serek Apo' vat.

Dima zî roniştişê Firat Darîyî ame dîyene. Darîyî roniştişî de qisey kerd û vat: "Ez bi îdîaya parşekerdişê welatî yena sucdarkerdene la derheqê ci de delîlêk çin o. Sucê mi têna wextê qedexeyanê vejîyayîşê teberî de herême de bîyayîş o.'' Mehkeme bi îdîaya 'xerakerdişê yewîye û yewparetîya welatî' cezaya muebede û bi îdîaya 'bi zanayîşî xîretkerdişê kiştişî' 6 serre û bi îdîaya 'zîyandayîşê malê komelî' 2 serre cezaya tepiştişî dayî Darîyî.

Mazlum Yaşa zî bi SEGBÎSî tewrê roniştişî bi. Mehkeme bi îdîaya 'xerakerdişê yewîye û yewparetîya welatî' cezaya muebede û bi îdîaya 'bi zanayîşî xîretkerdişê kiştişî' 16 serre û bi îdîaya 'zîyandayîşê malê komelî' 2 serre cezaya tepiştişî dayî Yaşayî.

Roniştişê Suleyman Goksel Yerdugî de zî avûkatê ci tewrê mehkeme bîyî. Terdugî îfade kerd ke îdîaname nas nêkeno û do derheqê ci de qisey nêkero. Yerdugî vat o endamê MLKPyî yo û meydanê MLKPyî de çeke xebitnaye û vat: "Ez bi hawayêkê zelalî eşkera kena ke ez vera DAÎŞî û faşîzmê Erdoganî û AKPyî têkoşîn kena. Ez waştişê veradayîşî kena. Biciwîyo partîya ma MLKP, Biciwîyê Rojawan û Kurdîstano Azad.'' Mehkeme bi îdîaya 'xerakerdişê yewîye û yewparetîya welatî' cezaya muebede û bi îdîaya 'bi zanayîşî xîretkerdişê kiştişî' 15 serre cezaya tepiştişî dayî Yerdugî.

Roniştişê Halîl Îbrahîm Yildizî de Mehkeme bi îdîaya 'xerakerdişê yewîye û yewparetîya welatî',  bi îdîaya 'bi zanayîşî xîretkerdişê kiştişî' û bi îdîaya 'zîyandayîşê malê komelî' cezaya muebede û cezaya tepiştişî dayî Yildizî. Avûkatê Yildizî seba pawitişî wext waşt. Heyetê mehkeme roniştiş taloqê 7ê sibata 2020î kerd.

Mehkeme roniştişê Îmalîl Yilmazo ke semedê asayîşî ra roniştişî de amade nêbi zî taloqê 20ê çeleyê 2020î kerd.