Dewaya Nisêbînî de muebedo girankerde ame waştene

Roniştişê dewaya Nisêbînî ame dîyene. Dozgerî waşt ke Nubahare Ozdemîr bi muebedê girankerdeyî bêra cezakerdene.

Roniştişê 17ê înan domanî 70 kesanê ke hêrişanê qirkerdişan ê vera Nisêbînê Mêrdînî ra dima 26ê gulana 2016î de ameyî destbendkerdene dewam kenê.

Ewro Mehkema Cezaya Girane ya 4. a Mêrdînî de çarçewa hukmkerdişî de dewaya tepişteye Nubahare Ozdemîr ameye dîyene. Ozdemîre Zîndanê Girewte yê Cinîyan ê Xarpêtî ra bi rayîrê SEGBÎSî tewrê roniştişî bîye. Dozgerî îdîa kerd ke Ozdemîre o çax ''qedexeyanê vejîyayîşê teberî'' de xizmetê weşîye dabi û seba Ozdemîre cezaya muebedê girankerdeyî waşt. Roniştiş taloqê 20 çeleyê 2020î bi.