Roniştişê Dewaya Nisêbînî yê 17ê ci domanî 70 kesanê ke 26ê gulana 2016î de qezaya Nisêbînî ya Mêrdînî de wextê xoverdayîşê xoîdarekerdişî de ameyebî destbendkerdene dewam kenê. Roniştişê 3ê kanûne de derheqê 2 kesan de reyna cezaya zindanî ameye dayene.

Reya verêne roniştişê Dîlbere Tanrikulu ame dîyene. Tanrikulu bi kurdkî pawitişê xo kerd û vat: ''Şima wazenê ke kurdan nê erdî ra def bikê, ma ser o bombayan varnenê. Ma ke di hebî guleyî eştî bîyî sucdar. Ê ma xoverdayîş û pawitişêko heqdar bi. Şima ra çîyêk nêpawena." Mehkeme derheqê Tanrikulu de bi îdîayanê ''xirabkerdişê yewîya welatî'' muebeda girankerdeye û ‘‘kiştişê bizanayîşî‘‘ 16 serre û ''zîyandayîşê malê dewlete'' 3 serre û ''bêdestûr kiriştişê madeyan ê ''teklûkeyênan'' 7 serrî û 6 mengî ceza daye.

Dima roniştişê Tufan Îlbaşî ame dîyene. Îlbaşî pawitişê xo bi hawayêkê nuştekî da. Avûkatê Îlbaşî zî beyan kerd ke hukmkerdiş bêhuqûqî û kêm o. Mehkeme derheqê Îlbaşî de bi îdîayanê ''xirabkerdişê yewîya welatî'' muebeda girane û ''kiştişê  bizanîyîşî'' 17 serre û ''zîyandayîşê malê dewlete'' 3 serre û ''bêdestûr kiriştişê madeyan ê teklûkeyênan'' 7 serrî û 6 mengî ceza daye.

Dewaya Nisêbînî de verê cû derheqê 26 tepişteyan de birî ameyî dayene. Heta nika Yasemîne Erkol 10 serre, Ozgur Sevîm cezaya muebeda girankerdeye û 25 serre, Îlyas Dogan, Omer Karataş, Osman Bozkurt, Hamît Acur û Akare Îkbal cezaya muebeda girane û 15 serre, Sadik Tan, Bayram Sevgîn, Firat Darî, Mazlum Yaşa û Hatîp Oyman cezaya muebeda girane û 18 serre, Ercan Dolaşir cezaya muebeda girankerdeye û 10 serre, Erkan Benlî cezaya muebeda girankerdeye û 20 serr û 3 menge, Bawer Başar cezaya muebeda girankerdeye û 19 serre, Mehmet Zîrîg cezaya muebeda girankerde û 17 serre, Suleyman Goksel Yerdut zî cezaya muebeda girankerdeye û 15 serre girewtî.

Derheqê Şukru Aybek, Hêja Algan, Emre Topçuoglu, Baran Eman, Çeçan Kîlkaya û Dîlan Aslan ê ke wexto ke ameyî tepiştene serrê înan qij bîyî de 35 serre ra heta 10 serre ceza ame dayene.

Tepişteyan ra Medya Çinar û Sîraç Yuksek dima ke vera tecrîdê Abdullah Ocalanî zindanî de xo vêşna dewayê înan ameyî girewtene.