HDP nê rojanê ke mudetêko tay mendo weçînitişan rê merkezê Ercîşî û dewanê ci de destekêkê pîlî vîneno. Namzedê hemserekîya Şaredarîya Ercîşî yê HDP’yî Yildiz Çetîne û Mahmût Pala, çarçewaya xebatanê weçînitişî de her cayê ke zîyaret kenê de bi hawayêkê kîtlekîyî yenê pêşwazîkerdene; zîyaretî hewayê mîtîngan de ravêrenê.

Dewa Hacikaşî ya ke herêma Gelîyê Zîlanî de ya her weçînitişî de ûca ra HDP’yî rê bi nisbetêkê berzî reyî vejênê. Dewa Hacikaş a ke bi serran o binê tedaya dewlete de ya, rixmê heme tedayan de 31’ê Adare de xo newe ra kena hadre ke vajo “HDP”.

Desteko pîl ê dewijan ê seba HDP’yî qaymeqamê Ercîşî Nûrî Mehmetbeyogluyî kerd mîyanê qesawetî. Qaymeqam dimayê zîyaretê HDP’yî ra tavilî şi Hacikaş. Gama ke eleqedarîya pîle ya ke ramojîya HDP’yî nêramojîya qaymeqam Mehmetbeyogluyî hêrs bi û gefê sey “Eke 31’ê Adare de HDP’yî rê yew reye zî vejîyo ez do dewijanê ke sazîyanê dewlete de şuxulênê kar ra bierzî” wendî.  

Dewijan zî vat, “namzedê HDP’yî dewa ma de bi hewayê mîtîngî ameyî pêşwazîkerdene. Ma sey şarê dewe ramot ke ma kîşta HDP’yî de yê. Dimayê zîyaretê HDP’yî ra tavilî qaymeqamê Ercîşî Nûrî Mehmetbeyoglu pîya bi leşkeran ame dewa ma. Dewe de çewî qaymeqam û heyetê ci rê eleqe nêmot ra. Gama ke qaymeqamî no dî, ma dewijan rê gefî wendî. Ma do tîya heqê xo yê demokratîkî bişuxulnê. Weçîntişî nê welatî de qanûnî nêyê? Ma do sey şarê dewe reya xo bidê HDP’yî.”