Bi desan dewê şaristanê Xoyî yê Rojhelatê Kurdîstanî erdlerzê 23ê sibate de rijîyayî. Muxabîranê ANFyî dewa Kortanava de mexdurê erdlerzî reyde qisey kerd.

Keyeyêkê dewa Kortanava ke keyeyê înan xera bi halê xo rê şukir kenê. Babîyê keyeyî 50 serre yo. Verê keyeyê xo yê rijîyayeyî de vinderto. Kişta ey de cinîya ci esta. A zî mîyanê tozî de ya. Dormeyê înan xera bîyî.

Babî vano: ''Şukir kesî rê çîyêk nêbi.' Dadîye dewam kena û qala hewcedarîyan kena. Vana; ''Hewceyê ma bi her çîyî esto.'' Wexto ke wina vana tay şermîyena. Cinîye-mêrde vanê ke her kes hetkarîya înan keno.

Tay wetî de keyeyêko bîn qala erdlerzî keno. Serra înan pîlêr a. Hûrdî zî sereyê xo girê dayî. Serd o. Vanê keyeyê înan xera bi. Qala erdlerzan kenê û vanê; ''Keyeyê her kesî xera bi.''

Dewijî vanê çew nêmerd, la birîndarî estê.Cinî û mêrdeyê kalî vanê keyeyê înan rijîyayî û gereka newe ra keyeyêk bivirazê. La îmkanê înan çin o. Coka pabeyê hetkarîya selahîyetdaran a.

Dewa Mexinî yê Kotolî zî xera bîye ke nêzdîyê Kortanava ya û rayîr de ya.  Zaf dewan de merdimê ke keyeyê înan xera bîyî teber de adir visnenê ta û xîret kenê ke xo germ bikerê. Keyeyê înan cuyêka xizane mojnenê ra. Têna merdimî ney zaf heywanî zî erdlerz de merdî. Xeylêk heywanî zî teber de mendî.

Xoy de şanê 23ê sibate bi şîdetê 5.9î di erdlerzî qewimîyayî. Herême de tewr tay 44 dewî rijîyayî, tewr tay 100 kesî birîndar bîyî. Asta xesarî nêna zanayene. Labelê dewijî pê hetkarîya kême qayîl nîyê. Mabênê di rojan de xeylêk erdlerzê qijkekî ameyî meydan coka dewijî biqesawet ê. Herême de zaf tenî tersenê ke dekewê keyeyan. Zimistano çetin cuye rê zaf tesîr keno.

Heman erdlerzî de qezaya Elbakî ya Wanî ya Vakurê Kurdîstanî zî xera bîye. Elbak de 9 kesî merdî. Herême de tewr tay 250 binayî xera bîyî.