Bajarekê Dêralokî yê bajarê Amedîye yê Başûrê Kurdîstanî de eşîrê Nêrwehî a Muhsin Hacî, Sefer Selîm û Hesen Sadiq nizdê dewa Zêwe de hetê teyarayanê şerî yê tirkî ra ameyî qetilkerdene.

Roja hêrişî ra dewijanê ke tira ra xebere nîna girewtene ewro herêma ke ameya bombardumankerdene de meyîtê înan ameye dîyene. Seba ke hêriş dewam keno merdimê înan a roje nêeşkenê şirê herême. Ewro zî wexto ke şar şîyêne herême teyarayanê şerî hêriş kerd ke înan vindarnê la şar peyser nêancîya û bi qerardar şi cayê hêrişî. Herême de cenazayê Muhsin Hacî, Sefer Selîm û Hesen Sadiq  ameye dîyene. Înanê ke cenazayê dîyî da zanayene ke ê bi teyarayanê şerî ameyî kiştene.

Medyaya PDKyî eştbi PKKyî ser

Hetê bînî ra wexto ke nê dewijan ra xebere nîna girewtene ra nata medyaya PDKyî îdîa kena ke PKKyî nê sîvîlî tepiştî. Reyna verî zî hêrişê hewayî yê vera Şeladizê de zî sîvîlê ke ameyî mirênayene medyaya PDKyî vatbi PKK dest nayo înan ser.