Keyeyê ke domanê înan koyan de yê, polîsî her roje erzenê keyeyanê înan ser û înan  tehdît kenê ke domanê xo peyser bîyarê.

Dewlete wazena tedaya pêro şarê Wanî bika. Wan û qezayanê ci de pêro çalakîyê demokratîkî ameyî qedexekerdene û tewr peyên dima ke pêro şaredarî ameyî xezpkerdene û qeyûmî ameyî wezîfedarkerdene hînî tedaya şarî ser o zêde bîye. Meridman rê cezaya pereyan yena dayene, gef ro înan yeno wendene û yenê destbendkerdene. Êyê ke yenê destbendkerdene bi rojan nezaretxane de manenê, îşkence bi înan yeno kerdene û xebere nêna dayene keyeyanê înan zî.

Keyeyêko ke domanê înan tewrê PKKyî bi ANF reyde qisey kerd û vat: "Bi taybetî serra peyêne de tedaya dewlete ya ma ser o bîye zêde.  Hewteyêk de di yan zî hîrê reyî erzenê keyeyanê ma ser. Cinîyan û domanan rê heqaret kenê. Mi rê vanê 'Domanê şima ça de yê, şima çira nêşinê înan nêanê? Şima nê domanan pîl kenê û erşawenê koyan.' Wazenê ke ma bitersnê. Ma înan ra nêtersenê û bawerîya ma bi dewaya ma bena zêder."