Komeleya Rojnamegeran a Dîcle Firatî (DFG) raporê binpaykerdişê heqanê rojnamegeran ê menga çeleyî bi eşkerayîyêka nuştekîye eşkera kerde. Komele eşkerayîya xo de bale ante tedaya vera rojnameran ser û ard ziwan ke 21 serr û 6 meng û 22 rojî cezaya zîndanî 4 rojnamegeran rê ameye dayene.

Eşkerayîya komele wina ya:

''Menga destpêke ya serra 2020î de zî teda û caardişê vera çapemenîye û rojnamegeran dewam kenê. Kedkarê çapemenîye, zaf meseleyan û astenganê cîyayan reyde rî bi rî mendî. Derheqê înan de dewayî ameyî akerdene û înan rê cezayî ameyî dayene.

Qaşo serra 2019î de paketêka hukmî amebî amadekerdene ke derheqê çapemenîye û rojnamegeran de tay weçînayîşî ameybî kerdene. La vurîyayîşêk nêame kerdene. Teda û zorîya vera rojnamegeran dewam kerd û rojnamegerî karî ra ameyî vetene, hêrişê vera înan zî dewam kerd. Derheqê rojnameyanê muxalîfan de dewayî ameyî akerdene, qertê çeqerî yê rojnamegeran ameyî batalkerdene û nêrazîbîyayîşan ra dima newe ra ameyî aktîfkerdene. 

Goreyê îqtîdarî êyê ke propagandaya îqtîdarî nêkenê rojnameger nîyê. Bi nê hawayî yeno waştene ke yew 'tîp' çapemenîye bêra awankerdene. Coka Tirkîya de kes nêeşkeno qala azadîya çapemenîye bikero. Her roje Tirkîya warê azadîya çapemenîye de pêser şina.

Heta ke çapemenîye azad biba ma do xebata xo dewam bikerê.

Doneyê îstatîkî yê raporê binpaykerdişê heqanê rojnamegeran

* Derheqê 2 rojnamegeran de dewa ameye akerdene
 

* 12 rojnamegerî ameyî hukmkerdene
 

* 21 serr û 6 meng û 22 rojî cezayê zîndanî 4 rojnamegeran rê ameyî dayene
 

* 2 rojenamegerî ameyî veradayene
 

* Qerto çeqer ê çapemenîye yê nêzdîyê hezar rojnamegeran ame batalkerdene û dima newe ra ame aktîfkerdene.

* 7 rojnamegerî karî ra ameyî vetene”