Qezaya Yenîşehîrî ya Amedî de roja 24’ê Temmuze hemverê wesayîtê zirxinî de çalakîyêk amî viraştene, ame zanayene ke 2 domanê ke dimayê çalakîye ra ameybî tepiştene ameyê berdene bi erazîyêka venge û ûca înan rê îşkence ameyo kerdene.
Maya M.A’yî Fatma Akkalina ke MA rê qisey kerd vat, “ê hende derb werdibi ke hendî xo ser o nêbi.”
Mehlaya Şehîtlîkî ya Yenîşehîrî de 24’ê Temmuze de hemverê wesayîtê zirxinî de çalakî amîbî viraştene, sereştişanê keyeyan de ke dimayê çalakîye ra ameybî kerdene M.A. (17) û A.E.’yê ke verê marketêk de roniştebî ameyî destbendkerdene.
Ame vatene ke M.A. û A.E. ameyê berdene bi erazîyêka venge ya ke serê rayîrê Amed-Farqînî de ya û ûca înan rê îşkence ameyo kerdene. Dimayê îşkenceyî ra 2 domanî ameyî berdene bi Mudurîya Asayîşê Amedî beşê Mudurîya Mucadeleyê Hemverê Terorî (TEM), ûca reya dîyine înan rê îşkence ameyo kerdene.
25’ê Temmuze na rey birayê M.A. yo 16 serre M.A zî ame destbendkerdene. Ame zanayene ke her di birayî û A.E. ameyê berdene bi Mudurîya Şûbeyê Domanan û ûca yenê tepiştene.
