''Serre û zeman derbaz bîyî. Serre bîye 2020, tornê Turanîyan reyna koyanê Kurdîstanî de yê. Na reye verê nînan de Rindêxanê neweyî estê. Destpêkê Cengê Heftanînî ra heta nika gerîlayê cinîyî morê xo danê binê nê cengî.''
Serewedaritişê Şêx Seîdî de cepheyê Mala Elîyê Ûnisî de kênaya Mihemedê Elî Rindêxane zî vera dişmenî şer kerdêne. Rindêxane bi rindî û çêrîya xo herême de nam kerdêne û bîyêne efsane. Rindêxane destpêke ra heta peynî tewr vernî de şer kerd. Rindêxane sey birîndare kewte destê dişmenî.
Fermandarê dişmenî xîret kerd ke tecawuzê Rindêxane bikero. Rindêxane tira vat: ''Ez tepişte ya, şima eşkenê bedenê mi rê her çi bikerê. La ez nêeşkena erdê babîyê xo de to reyde biba. Eke ti mîyanê nê sînoran de mi rê tecawuz bikerî ez do xo bikişa.'' Fermandarî tira persa ke sînorê babîyê ci kamca de qedîyeno. Rindêxane vat: ''Çemê Batmanî sînorê ma yo.'' Naye ser o fermandar qebul keno ke heta Pirdê Malabadî şoro.
Wexto ke ê resenê Pirdê Malabadî Rindêxane vana a do reya peyêne biewna erdê babîyê xo. Rindêxane şina serê Pirdê Malabadî û seba ke nêkewa destê dişmenî xo erzena awa Çemê Batmanî. Goreyê dengbêjan vateyê peyênî yê Rindêxane wina yê:
Ez rinda Rindêxane ya
Kênaya mîr û axa û koyan a
Ey tirko tacik
Çi gureyê to nê koyan de esto
Rinda bîye namdar
Ez mirena birîndar û bêzar
Teslîm nêbena destê neyarî û nêşina bêar...
Serre û zeman derbaz bîyî. Serre bîye 2020, tornê Turanîyan reyna koyanê Kurdîstanî de yê.Na reye verê nînan de Rindêxanê neweyî estê. Destpêkê Cengê Heftanînî ra heta nika gerîlayê cinîyî morê xo danê binê nê cengî û bi welatperwerîya Rindêxane şer kenê. Înan ra yew zî Fermandare Zelal a.
Zelale Sîdem yan zî Rojbîne Varli serra 1992î de Amed de dadîya xo ra bena. Zelale bena şahîda serewedaritişê 2006 û 2008 de hema ke ciwan bîye tewra gerîlayan bena. Zelale heta 2013 Zagrosan de manena. Wexto ke DAÎŞ hêrişê Kerkûkî kerd Zelale vera DAÎŞî şer kena.
Zelale 2018 ra dima Heftanîn de sey fermandare têkoşîn kena. Zelale heman wextî de şaîrêka ercîyaye ya. Aye pê qelema xo destanê Heftanînî kerd bêmerg.
Embaze Zelale wexto ke Şeşdara de rayberîya şerî kerdêne seba ke nêkewa destê dişmenî xo ser o bomba teqnaye. Serra 2020 de gerîla Zelale bi tewirê Rindêxane canê xo feda kerd. Zelale û Rindêxane bi rindî û çêrîya xo herême de nam kerd û bîyî efsane.
