Endama Komîteya Merkezî ya PKKyî Dilzar Dîlok serrgêra 25. ya Komployê Mîyanneteweyî ya vera rayberê Şarê Kurdî Abdullah Ocalanî de ANFyî rê qisey kerd.

Qiseykerdişê Dîloke ra tay qismê girîngî wina yê:

''Rayber Apo 1999yî ra nata Îmrali de yeno esîrkerdene. Sîstemê îşkence û tecrîdî yê Îmraliyî kerdişê dewleta tirke yo taybet o û tede huqûq çin o. Dewleta tirke armanc kena ke pê nê sîstemî şexsê Rayber Apoyî de îradeyê komelê kurdan çin bikera. Dewleta tirke ronîyayîşê xo ra nata cara dişmenîya kurdan kena. Na dişmenîye de hedefo tewr pîl zî qirkerdişê kurdan o. Ewro qirkerdişê kurdan pê tecrîdê Îmraliyî dewam keno. Modernîteya kapîtalîste Îmrali sey nimûneya newîye ya sîstemî şuxilnena. Xora Komployo Mîyanneteweyî hêrişêko winayên o ke sey se serranê Rojhelatê Mîyanênî û dinya ameyo hesabkerdene. Sîstemê Îmraliyî konseptê demokratîknêbîyayîşê Tirkîya ser o ronîyayo. Ronayoxê nê sîstemî Amerîka, Îsraîl, Îngilîstan û welatê Neteweyanê Yewbîyayeyan ê.

Prosesê Komployî de Rayber Apo 9ê teşrîna verêne ya 1998î de Sûrîye ra vejîya û heta 15ê sibata 1999î zî ey muracatê multecîtîye kerd, şarî reyde pêvînayîşî kerdî û meseleya kurdan pêro dinya rê vate. La 15ê sibate de Rayber Apo ame remnayene. Wexto ke Rayber Apo ame berdene bi Îmraliyî heyetêkê CPTyî ey pêşwazî keno. Tedayanê Amerîka, tedayanê Tirkîya yê vera Sûrîye, hemkarîya kurdanê xayînan konsensusêk awan kerd û bi nê hawayî vera PKK û Rayber Apoyî tewir ame girewtene. La Rayber Apoyî Îmrali vurna kerd merkezê şerê raştîye. A raşte Îmrali seba dewlete zî merkezê qirkerdişê komelî yo. Îmrali çembero peyên ê qirkerdişê vera kurdan o. 

Komployê Mîyanneteweyî armanc kerd ke kurdî seserra 21. de zî bêstatu bimanê. Amerîka û Yewîya Ewropa nêverda Rayber Apo bêro dardekerdene û wina hesab kerd ke tira fayde bivînê. Esîrkerdişê Rayber Apoyî ra dima hêrişê vera kurdan û PKKyî bi hawayêkê tewr bêrehmî ameyî kerdene. Prosesê Îmraliyî zî nameyê Ewropa ser o dewleta tirke muhakeme kerd. Mîyanê sîstemê Îmraliyî de Tirkîya gardîyanîya zîndanî kena. Seba ke Rayber Apoyî vera sîstemê kapîtalîstî têkoşîn kerdêne vera ey Komplo ame kerdene. La Rayber Apoyî Îmrali de paradîgmaya demokratîke, azadîgîra cinîyan, ekolojîke awan kerde û hişmendîya Îmraliyî pûç kerde. Îmrali de dewlete ney Rayber Apoyî dewletê neteweyî û modernîteya kapîtalîste muhakeme kerdî. Rayber Apoyî Îmrali de çemberê sîstemê qirkerdişê kurdan zî parçe parçe kerd.

Sîstemê Îmraliyî yo 25 serre şexsê Rayber Apoyî de vera ma pêroyînan yeno caardene. Modernîteya kapîtaliste sîstemê Îmraliyî pêro dinya rê ferz kena. Afernayoxê Îmraliyî Amerîka û Ewropa yê. Coka rewşa Îmraliyî tewr zaf înan eleqedar kena. Ma tewirê CPTyî de ney vînenê. CPT pêro persanê serê Îmraliyî mîyanê tarîtîye de verdeno û bi nê hawayî hetê polîtîkayanê tecrîdî gêno. Îqtîdarê AKP-MHPyî yo faşîst keno ke tecrîd vera şarê ma sey hacetî bişuxilno. 

Komplo û tecrîd vera têgêrayîşê ma û partîya ma zî yenê caardene. Armancê ma yo esas zî çinkerdişê tecrîdî û komployî yo. Vera tecrîdê Îmraliyî şarê ma mîyanê têkoşînêkê pîlî de yo. Embazê ma yê gerîlayî zî seba azadîya Rayber Apoyî xoverdayîş tim pîl kenê. Bêguman 2023 de çalakîyê ma do biresê asta tewr bere. Hetê bînî ra çalakîya Veysî Taşî ma rê ferman o. Ganî çalakîyê seba azadîya Rayber Apoyî hîna bitesîr û girseyî bibê ke wa îqtîdarê AKP-MHPyî birijîyo û gerîlayî ser bikewê. Dewleta tirke vera ciwanan şaristanan de polîtîkayanê şerê taybetî ana ca. Ciwanî û şarê ma wa vera nê polîtîkayan hayîdar bê û mîyanê çalakîyan de cabigêrê. Ciwanî hêzê ma yê tewr bitesîr ê. Serra 2023yî serra adirî ya. 2023 de qetî xeta Apogîre do ser bikewa. 

Heta ke Rayber Apo azad nêbo ma nêeşkenê azad bibê. Nika Îmrali de Rayber Apo xo ver dano; Zap, Avaşîn û Metîna de zî embazê ma yê gerîlayî vera hêrişanê kîmyewîyan şer kenê. Ez reyna şexsê Veysî taşî de pêro şehîdanê çalakîyanê 'Şima nêeşkenê tîja ma tarî bikerê' yad kena. Veysî Taşî mojna ke çalakîyê vera tecrîdî ganî senî bibê. Ma ganî manaya qiseyê 'Bê Rayberîye cuye nêbena' bîyarê ca. Ma amadekarîyanê xo bikerê, bi tedbîrî sibate de qerardarîya xo eşkera bikerê û azadîya Rayber Apoyî bîyarê ca. Servistişê nê armancan tek hedefê ma yo.''