Dîlokî de 10  endamê HDP û DBPyî yê bînî ameyî tepiştene

Dîlokî de Hemsereka Rêxistina HDPyî Sultane Bayindir zî tede 10 kesê ke operasyonanê 14ê teşrîna peyêne de ameybî destbendkerdene û bi şertê kontrolê edlîyî ameybî veradayenê, îtîrazê dozgerî ser o ameyî tepiştene.

14ê teşrîna peyêne de bi waştişê Serdozgerîya Komare ya Dîlokî operasyonanê vera endam û îdarekaranê HDP û DBPyî de 10 kesî amebî destbendkerdene û dima bi şertê kontrolê edlîyî ameybî veradayene. Dozgerî vera bira veradayîşî îtîraz kerd û 10 kesî ameyî tepiştene.

Dima ke îtîrazê dozgerî ame qebulkerdene Hemsereka Rêxistina HDPyî ya Dîlokî Sultane Bayindir, endamê Îdareyê HDPyî Mustafa Tunç, endamê Meclîsê HDPyî Omer Faruk Koç û Şefîk Sondu, Durrî Kaygusuz, Fadile Dîkîcî, Cumalî Taşçi, Ramazan Kuas, Azîme Balî û Muzlum Ozkan mehkeme de ameyî tepiştene.

Ame zanayene ke kesê ke ameyî tepiştene ameyî erşawitene bi Zindanê Girewte yê Tîpê Hyî yê Dîlokî.

Çarçewa tehqîqatî de derheqê 57 kesan de bira tepiştişî amebî vetene û înan ra 54 kesî amebî tepiştene. 54 kesan ra zî 25 kesî amebî tepiştene. Bi tepiştişanê peyênan hûmara tepişteyan bîye 35.