Hemserekê Cepheyê Şarî yê Demokratîkî û Endamê KNKyî Dr. Kamiran Berwarîyî peymana Şingalî û alozîyê Herêma Kurdîstanî ANFyî rê ercnayî.

Berwarîyî ard ziwan ke Rojhelatê Mîyanênî de tay hêzî goreyê menfaatê xo têgêrenê û vat: ''Kurdî 200 serrî seba heqanê xo xo ver danê.La seba ke mîyanê kurdan de yewî û îtîfaq çin ê erdê Kurdîstanî îşxal beno. 40 serranê peyênan de îradeyê kurdan resa astêka bîne.Hînî kurdî nêwazenê bêstatu biciwîyê.''

Berwarîyî bale ante peymana Şingalî ser û vat: ''Peymana Şingalî dewamê îşxalê DAÎŞî ya. PDK û Iraqî hemkarê hêrişanê Şingalî yê. Bi nê hêrişan ê wazenê komelê êzidîyan parçe bikerê. Bi peymana Şingalî cergê DAÎŞî reyna Şingal de do bêrê cadayene. Eke Şingal xoser bibo dîktatorê Kurdîstanî do çin bibê. Nê dîktatorî Şingal xo rê sey gefêk vînenê û coka xoserîya Şingalî nêwazenê. Heqê çewî çin o ke têbido karanê zereyî yê Şingalî. Hêzê PDK û Iraqî Şingalî ra remayî. Nika zî nêşermayenê û wazenê şarê êzidîyan îdare bikerê.Waştişê xoserîye yê Şingalî meşrû yo. Wayîrê raştikênî yê Şingalî xoverdayox, şehîd, keyeyê şehîdan û hêzê pawitişî yê Şingalî yê.''

Berwarîyî îfade kerd ke şingalijî pê çalakîyanê demokratîkan nêrazîbîyayîşê xo mojnenê û vat: ''Şarê Şingalî hewceyê hêzêkê teberî nîyo. Qet yew peymana ke êzidîyan ra bêxebere ameya kerdene do nêra qebulkerdene. Na peymane wazena xoserîya Şingalî çin bikera. No zî mojneno ke vera kurd û kurdanê êzidîyan komploya mîyanneteweyîye dewam kena. Komplogerî Şingalî ra dima verê xo do bidê Rojawan û Başûrî. Xoverdayîş û îradeyê şingalîjan do nê planî pûç bikerê. Ganî hêzê demokrasî û şarê Kurdîstanî vera na komplo vejîyê, hetê şingalijan de ca bigêrê û verê fermananê bînan bigêrê. Birînê êzidîyan 6 serrî yo dejeno û ê nêverdenê ke no birîn weş bibo. Ganî 4 parçeyê Kurdîstanî dormeyê Şingal û hêzanê Şingalî de bêrê pêser û destkewteyanê şehîdan bipawê. Ez venga pêro partî û hêzanê mîyanneteweyîyan zî dana ke vera na peymane bêveng nêmanê. Eke Şingal bêro vengkerdene Kurdîstan zî do bêro vengkerdene. Seba pawitişê Şingalî destê ma ra çita bêro ganî ma do bikerê.''