Endamê Konseya Fermandarîya HPGyî û Fermandarê Herêma Botanî Egîd Civyan (Vehîyettîn Karay) 11ê êlula 2020î de Wan de şehîd bi. Fermandar Egîd wexto ke DAÎŞî hêrişê Şingalî kerdbi, resabi hewarê înan. Şingalijanê ke ey şinasnenê qala şexsîyet, têkoşîn, perwerîya Fermandar Egîd Civyanî kerde.

Heso Birahîmo ke nêzdî ra Egîd Civyan şinasnayêne û bîyo şahîdê têkoşînê ey ê vera DAÎŞî vat: ''O egîdê serê koyan, embazê rojan ê giranan bi. Şehadetê ey ma zaf qehirnayî. Şingalijan rojanê tarîyan de o şinasna, seba şarê ma o sembolê estbîyayîşî yo. Ma tira vatêne 'Egîdê serê koyan.' sena ma o merkezê asayîş, bawerî, hêvî û çareserîye bi. Werdi kinc-mincî çi kewt destê ci da şarî. O çax kîloyêkî ardan ma rê sey xezîne bi. Ey şarê ma qirkerdiş, vêşanîye ra xelisna. O seba ma sembolê xoverdayîşî, hêvî, sebr û xelisîyayîşî yo. O çax seba ke ma verdayî û remayî ma pêşmergeyan rê hêrsbîyaye bîyî. Wexto ke pêşmergeyan waşt ke abigêrê Şingal ma xîret kerd ke verê înan bigêrê. La embaz Egîdî ma rê vat 'ê zî kurd ê, berpirsîyaranê înan beno ke bêbextîye kerde la yew guneyê înan çin o.' La dima înan îxanetê gerîlayan kerd û gerîlayî rastê hêrişê dewleta tirke ameyî. Embaz Egîdî tim xîret kerd ke êzidîyan rêxistin bikero coka ma perwerde kerdî. Ewro doman û şarê Şingalî bi xêrê keda embaz Egîd û embazanê ey bi aramî rakewenê û ciwîyenê. Embaz Egîd do tim zerrîya ma de bibo.''

Roniştoxê bi nameyê Biro Berkatî zî vat: ''Embaz Egîd koyanê Kurdîstanî ra ame û ma pawitî. Embaz Egîd serra 2004î ra heta serra 2007î seba ma têkoşîn kerd, kede daye. Keda ey awanbîyayîşê YBŞ û YJŞyî de zaf a. Embaz Egîd embazanê xo rê embaz, dişmenanê xo rê dişmen bi. Tim rayber bi. Dişmenî waşt ma bêrayber biverdo. Ma keye û şarê ma rê serweşîye wazenê. Şehîdê ma tim zerrîya ma de yê. Ma do rêçê embaz Egîdî ser o şorê.''

Roniştoxê bînî yê bi nameyê Heyder Şemoyî zî vat: ''Ma rojanê rengan de embaz Egîd şinasna. O fedakar, zerrînizm, çêr bi; vera dişmenî bêters û heybetin bi. Seba êzidîyan o rayber û payeberzo bêhempa bi. Helal bo a keda ey rê ke daye şarê Şingalî. Egîdê ma qet nêmerdo, tim ma reyde ciwîyeno.''