Serra 2018î de qezaya Pirsûsî ya Riha de pawitox û merdimanê Wekîlê AKPyî Îbrahîm Halîl Yildizî  hêrişê keyeyê Şenyaşarî kerd û hêrişî de 4 kesan dinyaya xo bedilnaye. Nê 4 kesan ra 3 kesî keyeyê Şenyaşarî ra bîyî. Roniştişo 4. yê dewa do ewro Mehkemeya Cezaya Girane ya 3. ya Meletî de bêro kerdene.

Emîne Şenyaşara ke mêrde û di lajê ci hetê pawitox û merdimanê Wekîlê AKPyî Îbrahîm Halîl Yildizî ra kişîyayî, reyna waştişê edaletî ard ziwan û waşt ke lajê ci Fadil Şenyaşaro ke 2 serran û nême ra nata tepişte yo wa bêro veradayene.

Emîne Şenyaşar vist vîrî ke merdimanê Yildizî verê çimanê aye de mêrdeyê ci kişt û vat: ''2 lajê mi kişîyayî û lajê min o bîn zî 3 serrî yo zîndan de odaya yewkesî de maneno. Serrêke û nême ra dima kesêk tepişîya, ê bînî teber de yê. No senî edalet o? Hînî bermayîşî ra çimê mi nêvînenê. Ez û mêrdeyê mi ma pîya şîbî nêweşxane. Verê çimanê mi de înan mêrdeyê mi kişt. Bi gonîya domananê mi dêsê nêweşxaneyî bibî sûr. Çira a şewe cade dêsî ameyî boyaxkerdene? Ez wazena wa lajê mi bêro veradayene. Wa no zulm biqedo. Wa edalet bêro caardene. ''

Ferît Şenyaşar zî îfade kerd ke îdîanameyo ke roniştişê verênî de amebi amadekerdene, îdîanameyêko terefgîr o. Ferîtî vat: ''Mi xeylêk reyan dîmenî seyr kerdî. Ez zanena çita qewimîyayo.''

Ferît Şenyaşarî eşkera kerd ke mehkeme tedaya sîyasî ra nêeşkena bira xosere bida coka vera roniştiş taloq kena.